Saudoza Maria da Silva. Imajen/Espesiál.

DILI, 02 jullu 2021 (TATOLI)—Prezidente Repúblika, Francisco Guterres Lú Olo, fó onra fúnebe ba Sekretária Organizasaun Popular Mulher Timorense (OPMT), Maria da Silva hodi haloot iha Jardim dos Heróis da Pátria, Metinaro, Dili, tanba ninian kontribuisaun iha luta ba Timor-Leste nia independénsia.

Tuir komunikadu imprensa ne’ebé Agência Tatoli aseu haktuir, Prezidente Repúblika fó onra fúnebre ne’e liuhusi Dekretu Prezidente Repúblika númeru 40/2021, 30 juñu, rekoñese Maria da Silva ninian kontribuisaun iha luta ba independénsia nasionál.

Saudoza Maria da Silva moris iha Uatolari, Viqueque, iha 26 marsu 1961. Nia oan dahaat hosi maun-alin 11 hosi inan-aman Mateus da Silva no Teresa da Silva no Helena Soares.

Veterana Maria daSilva hahú nia estudu iha 1968 iha Uatolari no kontinua iha koléjiu Waida’a hosi 1969-1973. Iha tinan 1974, nia kontinua estudu iha Fatumaca to’o militár Indonézia invade Timor-Leste.

Maria da Silva hahú envolve iha luta libertasaun nasionál iha 1975. Iha zona libertada, saudoza assume kargu nu’udar Sekretária Organizasaun Popular Mulher Timorense (OPMT) no ikusmai sai asistente polítika iha Zona 17 agostu. Hafoin zona libertada rahun, saudoza hetan detensaun hosi 1979-1984.

Maske iha detensaun preventiva nia laran, saudoza kontinua hala’o atividade klandestina ne’ebé iha ligasaun direta ho komandante Kalisá. Hamutuk ho nia aman, Maria da Silva envolve iha sesaun saúde no fornese informasaun ba luta armada no ba igreja atu lori dokumentu sai ba tasi-balun.

Maria da Silva sei hakoi iha Jardim dos Heróis Pátria Díli, iha Metinaro, iha 2 jullu 2021.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here