Komandante PNTL Covalima, Superintendente António Maria de Sá. Imajen TATOLI/Celestina Teles

COVALIMA, 02 jullu 2021 ( TATOLI) –Sentru Integradu Jestaun Krize (SIJK) fó sai ona sirkulár ida ba iha autoridade Munisípiu Covalima kona-ba abitante Covalima bele ona halo movimentu ‘livre’ mai Dili.

Maske nune’e, to’o agora komunidade Covalima seidauk informadu ho sirkulár ne’e. Tanba ne’e maka bainhira sira atu halo viajen mai Dili kontinua ba trata gia de marxa.

“Ita-nia komunidade seidauk asesu informasaun, entaun sira kontinua  mai iha komandu PNTL Covalima ho sala situasaun atu trata gia de marxa,” Komandante PNTL Munisípiu Covalima, Superintendente António Maria de Sá,  hato’o ba jornalista iha Salaun Administrasaun Munisípiu Covalima, sesta ne’e.

Superintendente António Maria de Sá, hateten, bazeia ba sirkulár hosi SIJK fó sai ona katak, movimentu viajen hosi Munisípiu Covalima ba Dili lá presiza trata gia de marxa. Tanba ne’e, Komandu PNTL Covalima hola papél hodi informa fali ba komunidade hodi bele informadu liután situasaun ne’e.

“Viajen Covalima ba Dili lá presiza trata gia de marxa. Maibé hosi Dili dezloka fali mai Covalima, maka obrigatóriu tenke iha rezultadu teste swab no trata gia de marxa,” António Maria de Sá hateten.

Durante implementa serka sanitária iha Munisípiu Covalima, Komandu PNTL hamutuk ho SIJK Covalima fasilita ona  gia de marxa hamutuk 1,352 ba abitante sira ne’ebé halo movimentu mai Dili ho asuntu urjénsia.

Jornalista       : Celestina Teles

Editór             : Francisco Simões

HAKEREK NO HATÁN

Please enter your comment!
Please enter your name here