Xefe Departamentu Empregu SEFOPE RAEOA, Tarsicio da Costa. Imajen Tatoli/Abilio Elo Nini.

OÉ-CUSSE, 01 Jullu 2021 (TATOLI)—Sekretária Estadu Formasaun Profisionál no Empregu (SEFOPE) fasilita no servisu hamutuk ho sentru Formasaun Bansone hodi fó kapasitasaun ba juventude Rejiaun Administrativa Espesiál Oé-Cusse Ambeno (RAEOA) na’in-65 hodi tuir formasaun kona-ba konstrusaun jerál, óspitalidade no agrikultura nian.

“Juventude 65 ne’e tuir formasaun kona-bá konstrusaun jerál ne’e iha área lima (5) mak hanesan kanalizasaun, karpintaria, eletrisidade, soldadura no pedreiru. Área agríkultura no ospitalidade laiha área seluk,” Xefe Departamentu Empregu SEFOPE RAEOA, Tarsicio da Costa, informa ba Ajênsia TATOLI iha nia servisu fatin, Pante Makasar, Oé-Cusse, kinta ne’e.

Hosi juventude na’in-65 ne’e, nia haktuir, loloos ne’e juventude na’in-80 mak tuir formasaun kona-bá kontrusaun jerál ne’e na’in-50 no na’in-15 seluk ne’e la ativu, entaun agora formandu sira-ne’ebé tuir hela formasaun ne’e hela 65.

Xefe departamentu empregu ne’e esplika, durasaun formasaun la’o to’o tinan ida tanba iha fulan neen (6) formandu sira tuir formasaun eskrita no fulan neen (6) seluk ne’e sira tenke ba halo estájiu ka prátika.

Totál formadór ne’ebé daudaun ne’e hanorin formandu sira iha sentru refere hamutuk na’in-ualu (8) ne’ebé rekruta hosi Oé-Cusse-oan de’it, maibé formadór ba área agríkultura mak hetan asisténsia hosi Sentru Formasaun Tibar.

“Dezde Governu estabelese, Sentru Formasaun Bansone ne’e harii ona iha RAEOA iha 2017 no halo ona graduasaun dala rua ona ba formandu hamutuk 100,” nia dehan.

Entretantu, fasilidade iha Sentru Formasaun Bansone ne’e kompletu no sufisiente tanba hetan apoiu materiál hosi Asian Development Bank (ADB) hanesan materiál ba área kontrusaun jerál no área agríkultura ne’e kompletu.

Jornalista : Abilio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here