Primeiru-Ministru, Taur Matan Ruak, prezide reuniaun estraordinária Konsellu Ministru, iha Palásiu Governu, kinta (01/07). Imajen TATOLI/Francisco Sony

DILI, 01 jullu 2021 (TATOLI)–Ministru Finansa (MF), Rui Augusto Gomes, hamutuk no Unidade Planeamentu, Monitorizasaun no Avaliasaun (UPMA) halo aprezentasaun ida iha reuniaun Konsellu Ministru (KM) kona-ba prosedimentu siklu Orsamentu Jerál Estadu (OJE) 2022.

“Aprezenta faze prosesu oioin ba preparasaun, deliberasaun no implementasaun OJE 2022 no garante katak bele kumpre prazu sira ne’ebé estabelese ona,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kuarta ne’e.

Siklu orsamentál ne’e, prevee mós katak Projetu Proposta Lei (PPL) OJE 2022 sei aprova hosi KM iha loron 17 setembru oinmai no submete ba Parlamentu Nasionál (PN) iha loron 01 outubru.

Komisaun Parlamentár sei apresia PPL orsamentál iha outubru no novembru, hafoin halo diskusaun no votasaun iha plenáriu sei hala’o to’o dezembru.

Enkuantu, tuir kalendáriu preprasaun OJE 2022, hahú semináriu Jornada Orsamentál iha loron 29 juñu, aprezentasaun planu makro—fiskál no GOP iha KM realiza iha loron 07 jullu.

Aprezentasaun no aprovasaun tetu fiskál dezagregadu realiza iha loron 14 jullu no submisaun proposta orsamentál liña ministériu sira iha loron 13 agostu.

Analiza proposta orsamentál liña ministériu sira no preparasaun pasta verde ne’ebé prepara hosi MF sei realiza iha loron 20 agostu, enkuantu Komisaun Revizaun Orsamentu Polítika (CROP, sigla portugés) halo apresiasaun finál iha loron 10 serembru.

Nune’e, reuniaun KM no aprova PPL OJE 2022 iha loron 17  setembru, no entrega proposta OJE 2022 ba PN iha loron 01 outubru.

Halo audiénsia entre Governu no PN, no fulan-dezembru 2021 debate proposta OJE 2022 iha loron 30 novembru.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here