LAUTÉM, 01 jullu 2021 (TATOLI)–Xefe suku Fuat, postu admistrativu Iliomar, munisípiu Lautém, Martins Pinto, hateten, veteranu, família inklui autoridade lokál ho esforsu rasik haloot ona restu mortál hosi eroi ne’ebé lakon vida durante luta ba ukun rasik-an.
“Daudaun ne’e hamutuk hotu iha suku ne’e no mate iha ai-laran hamutuk 223, nia boot mak Komisáriu Polítiku, Tomas Pinto ‘Tabesi fera naben’, ne’ebé ninia konstrusaun monumentu iha hela prosesu no atraza oituan tamba pandemia,” Xefe suku Fuat hateten iha fatin eroi libertasaun nasionál, suku Fuat, kinta ohin.
Autoridade suku ne’e esplika, hosi komunidade Fuat nia esforsu rasik konsenge haloot ona 85% hosi eroi nia restu mortál hamutuk 223, enkuantu iha fatin sentru restu mortál Fuat daudaun ne’e hamutuk 120, seluk iha suku anterior hamutuk 25, seluk haloot hamutuk ho Xefe Estadu Maiór FALINTIL-Forsa Defeza Timor-Leste (F-FDTL), Tenente Jenerál Lere Anan Timur, nia família iha Kainliu hamutuk 20 restu mortál no iha metinaro na’in-neen.
“Balun seidauk tamba sei prosesu hela inklui balun la hatene paradeiru, tanba ne’e ami sei prosesu hela maibé esforsu ne’e la’ós hosi Governu maibé hosi familia, veteranu rezisténsia sira mak halot iha fatin ida-ne’e ,” nia akresenta.
Suku Fuat kompostu hosi aldeia Acadirulo, Rumutau no Vataomar, ho totál populasaun hamutuk 1.400 resin.
Jornalista : Natalino Belo
Editora : Julia Chatarina
