Tékniku EDTL halo instalasaun eletrisidade iha área Bebora, Dili. Imajen TATOLI/António Gonçalves

OÉ-CUSSE, 30 Juñu 2021 (TATOLI)—Xefe Departamentu Eletrisidade de Timor-Leste (EDTL), Armindo Mendonca, hateten Dirasaun Rejionál Infraestrutura (DRI) Rejiaun Administrativa Espesiál Oé-Cusse Ambeno (RAEOA) prevee ona millaun $1,2 atu halo kompleta liña eletrisidade iha área remota hodi atinje 100% ba populasaun RAEOA asesu eletrisidade.

Armindo Mendonca hatutan, planu atu halo eliminasaun eletrisidade ne’e, parte Eletrisidade de Timor-Leste (EDTL) tau ona ajenda atu implementa iha tinan ne’e tanba Planta no Kadernu Enkargo (Bill of Quantity) prepara ona.

Notísia Relevante: Populasaun Oe-cusse 95% asesu ona ba eletrisidade

“Osan iha ona no dezeñu planta no kadernu enkargo (BoQ) prepara ona maibé ita persiza finaliza servisu teknika ruma. Faze preparasaun di’ak ona mak foin bele halo konkursu públiku, tanba ne’e servisu anteriór nian ho nia orsamentu hamutuk millaun $1,2 atu halo kompleta liña eletrisidade iha área remota,” Armindo Mendonca hateten b Agência Tatoli, iha nia servisu fatin, Pante Makasar, Oé-Cusse, kuarta ne’e.

Nia dehan, sei iha tan servisu tanba solar panel sira-nia la konsege halo tanba orsamentu lato’o, entaun uma kain sira-ne’ebé hela besik iha liña eletrisidade ne’e sei dada uluk ba sira no hirak ne’ebé hela dook-liu sei apoiu hodi monta solar panel de’it.  

Entretantu, Diretór Dirasaun Rejionál Infraestrutura RAEOA, Kandido dos Reis Amarál, hateten daudaun ne’e populasaun iha Rejiaun Administrativa Espesiál Oé-Cusse Ambeno (RAEOA) maiória populasaun 95% asesu ona eletrisidade no hosi pursentu ne’e falta uma kain 500-resin mak seidauk asesu eletrisidade.

Dirasaun Infraestrutura liuhosi Departamentu Elektridade dauudan ne’ea kontinua identifika fatin iha bairru balun izoladu tebes, tanba populasuan sira balun hela dook hosi rede distribuisaun entaun iha tinan ne’e autoridade aloka ona orsamentu atu kompleta komunidade sira-ne’ebé mak seidauk hetan iluminasaun (naroman).

“Ita-nia problema mak ida-ne’e, uma kain tolu (3) ka haat (4) hela do’ok hosi rede distribuisaun eletrisidade nian, entaun ita labele halo ligasaun hosi rede distribuisaun tanba kuustu karun liu. Maibé, iha bairu balun iha posibilidade ita bele halo,” Kandido dos Reis Amarál hateten.

Ho problema ne’e, nia dehan, Dirasaun Infraestrutura liuhusi servisu Eletrisidade de Timor-Leste (EDTL) rejiaun nian fó ona opiniaun ba prezidente autoridade aseita ona no iha tinan ida-ne’e sei aloka orsamentu atu bele kompleta ona halo ligasaun ba uma kain sira-ne’ebé mak seidauk asesu eletrisidade.

Uma kain 500-resin iha RAEOA ne’ebé seidauk asesu eletrisidade ne’e, kobre ba sub-rejionál haat (4) mak hanesan iha sub-rejiaun Nitibé, suku Bene-Ufe iha bairru Boen-Meto iha uma kain 27, bairru Bi-Eli-aldeia Manan uma kain 40-resin no balun seidauk identifika.

Iha sub-rejiaun Pante Makasar iha suku Taiboko, bairru Hauboni iha uma kain 50 mak seidauk asesu eletrisidade no balun sedauk identifika iha fatin seluk tan no iha sub-rejiaun Oésilo-bairru Nakome, suku Usitasae iha uma kain 50 no iha sub-rejiaun Pasabé ne’e seidauk identifika. 

Jornalista : Abilio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here