Parlamentu Nasionál liuhosi Grupu Feto Parlamentár Timor-Leste (GMPTL-sigla portugés) asina akordu memorandu entendementu ho PLAN Internasionál. Imajen Tatoli/Evaristo Soares Martins.

DILI, 30 juñu 2021 (TATOLI)—Parlamentu Nasionál (PN) liuhosi Grupu Feto Parlamentár Timor-Leste (GMPTL-sigla portugés) asina akordu memorandu entendementu ho PLAN Internasionál iha Timor-Leste ho objetivu atu kombate dezigualdade no diskriminasaun hasoru feto no labarik feto iha Timor-Leste.

Prezidente GMPTL, Deputada Lídia Norberta dos Santos Martins, konsidera PLAN Internasional nu’udar parseiru prinsipál ba GMPTL, liga ho asuntu labarik sira-nia kondisaun moris iha área saúde, edukasaun, sosiál no formasaun.

“GMPTL dezeja bom trabalho no susesu ba ita hotu, ho esperansa katak hamutuk ita bele kombate dezigualdade no kombate diskriminasaun hirak-ne’ebé akontese frekentemente hasoru feto no labarik feto sira iha Timor-Leste,” Prezidente GMPTL akresenta iha ámbitu serimónia asinatura memorandu entendimentu, iha sala konferénsia Parlamentu Nasionál, kuarta ne’e.

Prezidente GMTL konsidera asinatura ne’e nu’udar momentu espesial ida entre GMPTL no PLAN Internasionál Timor- Leste, hodi hametin liután serbisu parséria iha área advokasia nian.

“GMPTL no PLAN sei haforsa no hadi’ak liután relasaun serbisu no kolaborasaun serbisu ne’ebé estabelese ona antes no ba futuru, atu nune’e hamutuk bele asegura lejizlasaun ho perspetiva protesaun ba labarik feto no feto, atu sira bele goza direitu ba igualdade no inkluzaun sosiál,” Portavós Parlamentu Nasionál ne’e subliña.

Sekretária Meza Parlamentu Nasionál ne’e agradese ba PLAN nia inisiativa no disponibilidade ba kompromisu atu promove atividade advokasia hosi nível nasionál to’o munisipál kona-ba direitu ba labarik feto, foinsa’e no feto, atu haforsa liután prezensa no atividade GMPTL nian iha baze.

Entretantu, Diretora PlAN Internasionál Timor Leste, Dillyana Ximenes fó-sai katak, akordu ne’e sei foka ba advokasia integrasaun direitu labarik no igualdade ba labarik feto, liuliu haree mós ba lei nasionál kona-ba protesaun labarik feto no feto.

“Ohin, marka istória signifikante ida tán, ba esforsu koletivu iha luta ba direitu labarik, no realiza igualdade ba labarik feto no feto, hodi kontinua haburas advokasia ba igualdade jéneru iha uma fukun Parlamentu Nasional,” nia katak.

Diretora PLAN Internasionál ne’e hatutan, kooperasaun ne’e sei promove serbisu advokasia ne’ebé organizadu, integradu no sistimátiku hodi asegura direitu labarik, adolexente labarik feto no feto, bele hetan igualdade iha konteúdu aprovasaun lei nasionál sira.

Akordu memorandu entendementu ne’e asina hosi Prezidente GMPTL no Diretora PLAN Internasionál iha Timor-Leste Dillyana Ximenes, ne’ebé akompaña hosi Prezidente Parlamentu Nasionál, Deputadu Aniceto Longuinhos Guterres Lopes, sasin hosi Deputada Josefa Álvares Pereira no parte PLAN sasin hosi Adjunta Fátima Soares, 

Memorandu entendimentu ne’e, ba faze dahuluk ba períodu tinan tolu, hahú hosi 2021 to’o 2024 no PLAN Internasionál sei apoia pesoál rekursu umanu na’in-rua ba Grupu Feto Parlamentár Timor-Leste (GMPTL).

Tuir Konstituisaun RDTL artigu 18 (Protesaun ba labarik-oan sira), númeru 1 hateten labarik sira iha direitu ba protesaun espesiál hosi família, komunidade, nomós estadu, liuliu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no explorasaun.

Númeru 2 hosi artigu ne’e hatutan, labarik sira hetan direitu hotu-hotu ne’ebé mundu rekoñese, hanesan direitu sira-ne’ebé hakerek ona iha konvensaun internasionál, ne’ebé estadu aprova no simu ona ka ratifika fila-fila.

Nune’e mós númeru 3 hosi artigu 18 ne’e subliña, labarik hotu-hotu ne’ebé moris iha kazamentu nia laran ka lae, iha direitu hanesan kona-ba protesaun sosiál.

Purtantu oras ne’e Komisaun F ne’ebé Komisaun F ne’ebé trata asuntu Saúde, Seguransa Sosiál no Igualdade Jéneru, diskute hela projetu-lei protesaun ba labarik sira.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here