Atividade AIFAESA halo fiskalizaun ba folin sasán iha munisípiu Baucau. Imajen/AIFAESA

DILI, 29 juñu 2021 (TATOLI)—Inspetór Jerál Autoridade Inspesaun Fiskalizasaun Atividade Ekonómika, Sanitária no Alimentar (AIFAESA), Ernesto Monteiro, hateten, tempu badak nia laran ekipa autoridade sei desloka ba munsisípiu haat hodi halo inspesaun.

“Iha tempu badak, ami sei halo inspesaun iha munisípiu Aileu, Ainaro, Same no Covalima, daudaun ami-nia ekipa preparadu ona no kona-ba dokumentu viajen, ami prosesa ona iha Sentru Integradu  Jestaun Krize (CIGC, sigla portugés) no hein de’it kuandu autoriza ona ami bele desloka,” Inspetór Jerál informa ba Agência TATOLI, via telefónika, tersa ne’e.

Notísia relevante: AIFAESA prosesa ona operadór ekonomiku hasa’e folin sasán

Tuir responsável ne’e, atividade ne’ebé AIFAESA halo atu kontrola kualidade no presu ai-han iha loja sira.

“Ami tenke kumpre knaar ne’ebé iha no ami sei la la’o mesak, sei hamutuk ho autoridade kompetente hodi halo serbisu ida-ne’e,” nia akresenta.

Antes ne’e, durante halo inspesaun iha operadór ekonómiku sira, autoridade ne’e deteta negosiante sira hasa’e folin ne’ebé la razoavel ba materiál konstrusaun no nesesidade bázika.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here