Jestór Operasionál Entrepreneur Institute (EIROS), Filipe de Sousa Soares. Imajen Tatoli/Nelia Fernandes.

DILI29 juñu 2021 (TATOLI)—Jestór Operasionál Entrepreneur Institute (EIROS), Filipe de Sousa Soares, hateten iha tinan 2003 to’o 2021 EIROS halo parseria ho Governu hodi fó formasaun ba funsionáriu públiku sira hosi instituisaun Estadu.

“Hahú ezisténsia hosi 2003 to’o agora, liuliu parseriu ne’ebé ami servisu hamutuk ho Governu, hanesan Ministériu Finansa, Gabinete Primeiru-Ministru (GPM) no Ministériu Solidariedade Sosiál no Inkluzaun (MSSI), hodi fó formasaun ba funsionáriu sira,” Filipe de Sousa Soares hateten ba Agência Tatoli, iha nia kna’ar fatin Mandarin, Díli, tersa ne’e.

Iha tinan 2017 to’o 2018, EIROS halo parseria ho Ministériu Finansas hodi fó formasaun ba funsionáriu públiku sira iha Munisípiu 13 hodi tuir kursu kona-ba aprovisionamentu no númerasia.

Hosi tinan 2014 to’o 2015, EIROS halo parseria ho Gabinete Primeiru Ministru (GPM) fó formasaun ba funsionáriu públiku iha lian português no inglés, ho maneira formadór mak ba fó formasaun ba sira iha sira-nia servisu fatin tuir sira-nia tempu no oráriu ne’ebé determinadu.

Entretantu, iha tinan 2019 Eiros mós fó formasaun ba Ministériu Solidariedade Sosiál no Inkluzaun (MSSI), hodi fó formasaun kona-ba area kontabilidade nian durante semana tolu nia laran no hetan sertifikadu.

Fungsionáriu ne’ebé tuir formasaun iha EIROS hosi Ministériu Finansas hamutuk na’in 16, Gabinete Primeiru Ministru (GPM) na’in 12 no Ministériu Solidariedade Sosiál no Inkluzaun (MSSI) hamutuk na’in-neen (6).

Totál fungsionáriu iha EIROS hamutuk na’in-14, kompostu hosi funsionáriu na’in-neen (6) no formadór na’in-ualu (8).

EIROS sei reativa formasaun iha fulan oin

Entretantu, Jestór ne’e informa tuir planu EIROS planeia sei reativa formasaun ba formandu sira iha fulan jullu tinan ne’e, tanba iha semana kotuk komesa kontaktu ona ba formandu sira-ne’ebé disponivel bele mai aprezenta an, nune’e bele hatene na’in hira iha foho no na’in hira iha Díli, nune’e bele halo komunikasaun.

Formandu sira-ne’ebé iha ne’e, EIROS rekomenda atu ba tuir ona vasina no maiória simu vasina ona doze dahuluk no hein fali doze daruak ba nian, nune’e bainhira la’o karik la’o iha mahon protokolu Ministériu Saúde (MS) no Organizasaun Mundiál Saúde (OMS) nian.

“Ami-nia inisiu anu letivu iha fevereiru tinan 2021 ami hahú ona, maibé iha momentu ne’ebá seidauk ofisiálmente atu hahú materia sira-ne’e, tanbá ligadu ho Governu implementa serka sanitária no konfinamentu obrigatóriu,” nia dehan.

Totál formandu ne’ebé tuir formasaun iha 2021 hamutuk na’in-134 ne’e tuir formasaun iha área formasaun Administrasaun Finansa, IT, Inglés, no Komputadór.

Sentru Formasaun Entrepreneur Institute (EIROS) harii iha loron 10 fulan-novembru tinan 2003 iha tranzisaun Governasaun hosi UNTAET nian, ne’ebé harii hosi João Paulo Gama Guterres ne’ebé daudaun ne’e hanesan Diretór ezekutivu.

Jornalista : Nelia Fernandes 

Editór       : Cancio Ximenes

HAKEREK NO HATÁN

Please enter your comment!
Please enter your name here