Plenária Parlamentu Nasionál. Imajen Tatoli/António Gonçalves.

DILI, 29 juñu 2021 (TATOLI)—Bankada Partidu Libertasaun Populár konsidera prosesu konkursu ne’ebé la’o iha Bee Timor-Leste Empreza Públiku (BTL,E.P) la’ós hanesan ezonerasaun ba traballadór sira-ne’ebé tinan naruk haknaar-an iha fatin refere.

Depuatdo PLP, Noe da Silva Ximenes. Imajen Tatoli/Egas Cristovão.

Deputadu Bankada Partidu Libertasaun Populár (PLP), Noé da Silva Ximenes “Buka-Tuir”, konsidera katak prosesu konkorsu iha BTL,E.P ne’e, loloos ne’e la’ós ezonerasaun ka duni-sai ema tanba tuir estatutu BTL,E.P tenke realiza konkursu públiku.

“Tuir estatutu BTL,E.P, kuandu ita hakarak tama iha funsionáriu BTL nian, automatikamente ita tenke hili dalan rua. Ida, ita hakarak nafatin sai funsionáriu públiku no ida seluk ita hakarak sai funsionáriu empreza públika nian. Se ita hili funsionáriu públika entaun ita labele tama iha empreza públika,” Noé da Silva Ximenes “Buka-Tuir” hateten liuhosi plenária, tersa ne’e.

Entretantu Bankada Frente Revolusionária Timor-Leste Independente (FRETILIN), Deputadu Bankada FRETILIN, Fabião de Oliveira, kestiona maka’as ba prosesu konkursu ne’ebé la’o iha BTL,E.P tanba ema-ne’ebé iha esperiénsia tinan naruk la pasa.

“Ha’u kestiona no ha’u lamentável tebes prosesu konkursu ne’ebé la’o iha BTL,E.P tanba iha traballadór ne’ebé ke mate-restu 12 novembru nian, ne’ebé ke tuir konkursu maibé la laliu. Sira-ne’ebé esperiénsia tinan barak nian iha esperiénsia atu halo operasaun serbisu iha Empreza Públika Bee Timor-Leste maibé la pasa. Ha’u kestiona prosesu ida-ne’e. Ne’e laloos,” nia dehan.  

Nia parte lakohi Timor-oan sira-ne’e sai vítima tanba sira iha ona esperiénsia tempu naruk kona-ba bee-moos nian maibé hasees tiha sira hosi sira-nia Serbisu, entaun presiza haree situasaun sira hanesan ne’e.

Tanba ne’e, nia husu ba BTL,E.P atu halo avaliasaun fila-fali no bele halo mós investigasaun ba empreza públika ne’e hodi hatene loloos kazu ne’ebé akontese.

Deputadu Bankada FRETILIN, Mariano Fatubai Mota “Marito Mota”, reforsa funsionáriu sira dirasaun água no saneamentu ne’e serbisu tinan barak ona maibé sai fali vítima ba transformasaun empreza públika ne’e.

“Ita hatene karak durante tinan naruk, sira tuir formasaun iha Japaun, Thailándia no too’ ikus mai la uza sira sira-ne’e hatene kahur ai-moruk ba bee-moos, ita uza fali sira entaun sá polítika mak ida-ne’e,” Deputadu Marito Mota kestiona.

Vise-Xefe Bankada KHUNTO, Deputadu António Verdiál de Sousa, hakfodak uitoan ho asaun ne’ebé halo hosi ema boot ida ho pozisaun hanaran “Prezidente Be Timor- Leste (BTL-EP)”, ne’ebé dehan ho pozisaun refere mak ezekuta dekretu-lei no.4/2020, 25 setembru, ne’ebé kria Empreza Publika Bee Timor Leste no aprova estatutu hatuur iha artigu 8, la deskreve deskrisaun ida-ne’ebé klaru kona-ba funsionáriu kuadru públiku iha SAS atu hetan ezonerasaun.

Nia dehan, razaun ne’ebé Prezidente Be Timor-Leste,E.P ezonera servisu na’in hirak-ne’e ho lia fuan simples dehan katak “sira laiha koñesimentu ka laiha kapasidade”.

“Ne’e razaun ne’ebé la razoável no laiha responsabilidade hanesan lideransa. Tanba ema hirak-ne’e, serbisu iha Dirasaun Jerál Água no Saneamentu ho tinan barak ona. Tanba ne’e, bankada KHUNTO husu ba VIII Governu Konstitusional avalia fila-fali serbisu Empreza Públika Be Timor-Leste, ne’ebé la atinje nian vizaun, misaun no programa mak presiza tetu fila-fali. Tanba kondisaun ekonomia rai laran agora daudaun fraku tebes,” Vise-Xefe Bankada KHUNTO ne’e fó hanoin.

Jornalista : Evaristo Soares Martins

Editór       : Cancio Ximenes

 

1 KOMENTÁRIU

  1. Ami mos aply ba vaga ida nee ida sira fo sai katak presiza minimu stm agora ami s1 no iha ona sperensia tinan 9 no hau kaer no susesu entrega 100 % rehablitasaun bomba bee bidau toko baru, rehablitasaun uma no moru bidau ai lele hun, kontrusaun moru reservatori bidau masaur no moru no uma panel iha metiaut soque lakomprende tamba saida ita laliu iha Docmentus nee.

HAKEREK NO HATÁN

Please enter your comment!
Please enter your name here