Bee-moos. Imajen/Espesiál

DILI, 29 juñu 2021 (TATOLI)—Bankada Frente Revolusionária Timor-Leste Independente (FRETILIN) no Kmanek Haburas Unidade Nasionál Timor Oan (KHUNTO), kestiona prosesu konkursu ne’ebé la’o iha Bee Timor-Leste (BTL, E.P) tanba ema-ne’ebé iha esperiénsia tinan naruk la pasa.

“Ha’u kestiona no ha’u lamentável tebes prosesu konkursu ne’ebé la’o iha BTL, ep tanba iha traballadór ne’ebé ke mate-restu 12 novembru nian, ne’ebé ke tuir konkursu maibé la liu, sira-ne’ebé esperiénsia tinan barak nian iha esperiénsia atu halo operasaun serbisu iha Empreza Públika Bee Timor-Leste maibé la pasa. Ha’u kestiona prosesu ida-ne’e. Ne’e laloos,” Deputadu Bankada FRETILIN, Fabião de Oliveira, levanta liuhosi plenária, tersa ne’e.

“Ita lakohi ita-nia maluk sira-ne’e sai vítima, tanba sira iha ona esperiénsia tempu naruk kona-ba bee-moos nian, maibé hasees tiha sira hosi sira-nia serbisu. Ida-ne’e presiza haree situasaun sira hanesan ne’e,” nia fó hanoin.

Tanba ne’e, nia husu ba BTL EP atu halo avaliasaun filafali no bele halo mós investigasaun ba empreza públika ne’e hodi hatene loloos kazu ne’ebé akontese.

Entretantu, Deputadu Bankada FRETILIN, Mariano Fatubai Mota “Marito Mota”, reforsa funsionáriu sira Diresaun Água no Saneamentu ne’e serbisu tinan barak ona maibé sai fali vítima ba transformasaun empreza públika ne’e.

“Ita hatene karak durante tinan naruk, sira tuir formasaun iha Japaun, Tailándia no to’o ikusmai la uza sira sira-ne’e hatene kahur ai-moruk ba bee-moos, ita uza fali sira entaun sá polítika mak ida-ne’e,” Deputadu Marito Mota kestiona.

Purtantu, Vise-Xefe Bankada KHUNTO, Deputadu António Verdiál de Sousa, hakfodak uitoan ho asaun ne’ebé halo hosi ema boot ida ho pozisaun hanaran “Prezidente Be Timor- Leste (BTL-EP)”, ne’ebé dehan ho pozisaun refere maka ezekuta dekretu-lei no.4/2020 datadu 25 setembru ne’ebé kria Empreza Publika Bee Timor Leste no aprova estatutu hatuur iha artigu 8, la deskreve deskrisaun ida-ne’ebé klaru kona-ba funsionáriu kuadru públiku iha SAS atu hetan ezonerasaun.

Nia dehan, ema hirak-ne’e, serbisu iha Diresaun Jerál Água no Saneamentu ho tinan barak ona tanba ne’e bankada KHUNTO husu ba VIII Governu Konstitusional avalia filafali serbisu Empreza Públika Bee Timor Leste, ne’ebé la atinje nian vizaun, misaun no programa.

Entretantu, Deputadu Bankada Partidu Libertasaun Popular (PLP), Noé da Silva Ximenes “Buka-Tuir”, esplika loloos ne’e la’ós ezonerasaun ka duni-sai tanba tuir estatutu BTL tenke realiza konkursu públiku.

“Tanba tuir estatutu BTL, kuandu ita hakarak tama iha funsionáriu BTL nian, autonomatikamente ita tenke hili dalan rua, ida ita hakarak nafatin sai funsionáriu públiku no ida seluk ita hakarak sai funsionáriu empreza públika nian. Sé ita hili funsionáriu públika entaun ita labele tama iha empreza públika,” nia fundamenta.

Jornalista: Evaristo Soares Martins

Editór: Cancio Ximenes

1 KOMENTÁRIU

  1. To ona tempu ba Guvernu atu avalia servisu BTL iha ita nia rain,hahu husi gestor BTL nian Tun mai fungsionario sira hotu,ami povu kiik nebe maka sofre ba bemos durante nee harohan makas los ba Aman Maromak atu fanun guvernu hakfodak husi dukur,hodi tau sistema fornesementu Be Mos ida diak nune ema hotu bele asesu be mos hanesan.tuir ami nia hare durante nee laiha planu no kontrolasaun diak husi guvernu liu liu Gestor BTL kona ba kanalijasaun be tama ba uma komunidade sira, tamba ne maka mosu komunidade balu mukit hetan be mos no balun hetan be mos resin no estragus fali ba baleta koak sira” ita bele hare iha area Terminal Bekora”ami povu kiik mehi tebes hakarak hetan bemos hanesan ami nia maluk sira seluk,maibe mehi sira nee ami entrega ba nai ulun sira maka tetu no hanoin hodi buka solusaun.
    ami iha sujestaun hato ba guvernu kona ba fornesementu Be Mos hanesan ba komunidade sira hotu maka hanesan tuir mai nee:
    1)Tenki tau horario kanalijasaun BeMos ba Komunidade sira kada Aldeia ou Bairo- Bairo.
    2)Tenki iha Fungsionario Permanente ida iha kada suku ou aldeia hodi halo kontrolasaun ba meteran Be mos nian.
    3)Tenki iha kanalijador iha kada suku ka aldeia hodi tau matan ba kanu kiik sira nebe dada Be Mos ba uma komunidade sira.
    4)Guvernu tenki tau matan ba reboisasi ou hamatak fila fali wetan sira.
    5)Tenki aplika multa makaas ba komunidade sira nebe maka dada bemos ho illegal.l

HAKEREK NO HATÁN

Please enter your comment!
Please enter your name here