DILI, 28 juñu 2021 (TATAOLI) – Ministériu Ensinu Superiór, Siénsia no Kultura (MESSK) halo hela esforsu atu uniformiza kurríkulu ida nu’udar padraun mínimu ba Instituisaun Ensinu Superiór Públiku no Privadu (IESPP)-sira atu aliña ho nesesidade merkadu traballu iha futuru.
“Ami hahú diskute daudaun hodi elabora dadus hotu hodi hetan konkluzaun ikus, atu nune’e, ita bele hatuur padraun ida di’ak atu garante dezenvolvimentu edukasaun iha ensinu superiór nia laran,” Ministru MESSK, Longuinhos dos Santos, informa ba jornalista sira iha salaun Ian Martin INFORDEPE, Balide, Dili, segunda ne’e.
Nia esplika programa kurríkulu padraun mínimu ne’e planu prioridade MESSK nian, dadus sira ne’e hahú rekolla iha 2020 kona-bá mekanizmu metodolojia hanorin no kargu oráriu ba kurríkulu ne’e rasik.
Iha fatin hanesan, Magnífiku Reitór Universidade da Paz (UNPAZ), Adolmando Amaral, konsidera semináriu kona-bá kurríkulu padraun mínimu ne’e laiha rezultadu tanba semináriu ne’e rona de’it peritu sira-nia esperiénsia no opiniaun kona-ba kurríkulu nasionál ne’e rasik.
Tuir nia katak servisu atu rekolla dadus hodi prepara atu formula padraun mínimu kurríkulu nasionál ne’e iha ona ekipa servisu ida ne’ebé mak responsabiliza hela, ekipa ne’e forma iha 2014-2015 liubá, oinsá atu prepara padraun mínimu ida bá kurríkulu nasionál.
Nia hateten, lolos ne’e servisu ekipa nian maka buka atu formula kurríkulu ida hodi lori mai diskute atu sai padraun ida iha kurríkulu nasionál bá IESPP-sira. La’ós mai atu rona beibeik esperiénsia.
Magnífiku Reitór Universidade Orientál (UNITÁL), Florindo Pereira, hateten importante padraun mínimu kurríkulu nasionál ba IESPP-sira ho intensaun atu hadi’a kualidade rekursu umanu iha futuru.
Nia dehan kada IESPP sira uza rasik métodu ida-idak nian hodi hanorin laiha uniforme padraun kurríkulu nasionál ida. tanba ne’e presiza loke beibeik diskusaun no debate atu bele hetan padraun kurríkulu ba interese nasionál.
Sei fornese ekipamentu prevensaun COVID-19
Ministru Ensinu Superiór Siénsia no Kultura (MESSK), Longuinhos dos Santos, sei apoiu ekipamentu prevensaun COVID-19 ba estudante 75.000 iha Instituisaun Ensinu Superiór Públiku Privadu (IESPP) bainhira atividade letiva hahú ona.
“Ita atu re-ativa atividade letiva prejensiál, ita sei prepara máskara, hand sanitizer, no termus scanner bá IESPP-sira,” Longuinhos dos Santos hateten.
Nia esplika ekipamentu prevensaun COVID-19 ne’e balun Ministériu Ensinu Superiór hetan tulun hosi Ministériu Saúde. Maibé kuantidade estudante iha EISPP barak liu kompara ho máskara ne’ebé limitadu. Tan ne’e, ministériu sei prevee osan uitoan atu kompleta tan nesesidade bá estudante 75.000 ne’ebé rejistadu .
Subsídiu pulsa internet no injesaun propina iha prosesu
Ministru Longuinhos dos Santos, akresenta katak apoiu subsídiu pulsa internet no injesaun propina bá estudante-sira agora daudaun tama ona iha prosesu no Ministériu Finansas sei verifika fila fali dokumentu estudante-sira nian kuandu loos hotu ona MF sei informa mai MESSK kona-bá prosesu pagamentu.
Tuir nia katak normálmente kuandu atividade aula prejensiál re-ativa ona. Prosesu pagamentu subsídiu ne’e mós sei la kontinua tan. Signifika pagamentu ne’e sei remata de’it iha primeira faze. segunda faze sei la kontinua tanba lei mak hateten.
Jornalista : Tomé Amado
Editór : Francisco Simões
