Diretora Sentru Formasaun Action for Change Foundation (ACF), Veronica de Sousa. Imajen Tatoli/Nelia Fernandes.

DILI28 juñu 2021 (TATOLI)—Governu Japaun liuhosi Fundu Civil Sciety Foundation (CESP) fó apoiu rihun $90 hodi halo konstrusaun no reabilitasaun ba sentru saúde iha Munisípiu Lautém.

Diretora Sentru Formasaun Action for Change Foundation (ACF), Veronica de Sousa, hateten iha tinan 2020 ACF hetan konfiansa hosi Embaixada Japaun hodi halo kontrusaun no reabilitasaun ba sentru saúde númeru 2 iha aldeia Sentrál, suku Fuiloro, postu administrativu Lospalos, munisípiu Lautém.

“Dadaun ne’e, ami-nia konstrusaun no reabilitasaun seidauk finaliza tanbá impaktu hosi pandemia COVID-19. Maibé, ami sei finaliza iha fulan jullu nia laran,” Veronica de Sousa hateten ba Agência Tatoli, iha nia kna’ar fatin Ai-tarak laran, Dili, segunda ne’e.

Durasaun ba konstrusaun no reabilitasaun ba sentru saúde númeru 2 iha Lospalos ne’e tinan ida, hodi halo konstrusaun no reabilitasaun ba sala maternidade no administrasaun nian.

Entretantu, iha tinan 2018, Action for Change Foundation (ACF) halo parseria ho Embaixada Japaun liuhosi fundu Grant Assistance for Grassroots Program (GGP) ho montante $88,856 hodi halo konstrusaun ba Eskola Ensinu Báziku Filiál (EBF, sigla portugés) Taimea iha suku Malilait, postu administrativu Bobonaro, munisípiu Bobonaro.

“Liuhosi fundu ida ne’e, ami halo konstrusaun ba eskola sala-de-aula hamutuk tolu no haris fatin lima (5). Durasaun ba projetu ne’e tinan ida, hahú hosi marsu 2018 no remata fali iha marsu 2019. Ami entrega ona konstrusaun eskola ne’e ba EBF Taimea iha 4 abril 2019, no sira hahú utiliza ona eskola ne’e hodi hala’o prosesu aprendizajen,” nia informa.

Iha tinan 2018 to’o mai 2021, ACF mós halo parseria ho Civil Society Education Partnership (CSEP) hodi implementa atividade ho naran Youth Action Resears (YAR) ho fundu hosi CSEP hamutuk rihun $1,329.

Atividade ne’e hala’o iha munisípiu Liquiça hodi halo peskiza ba foinsa’e sira-ne’ebé defisil atu asesu edukasaun no dadaun ne’e planu hela atu ba halo tan monitórizasaun no estende ba iha munisípiu seluk ho programa ne’ebé hanesan.

“Atividade ho naran Youth Actiong Resears (YAR), ida ne’e, ami tun ba halo peskiza, liuliu ligadu ho joventude sira-ne’ebé defísil atu asessu ba edukasaun kaben sedu, no ekonómia la to’o atu asessu ba edukasaun no atividade ne’e halo iha 2018 to’o 2021,” nia dehan.

Entretantu iha tinan 2021, ACF parseria ho Civil Society Education Partnership (CSEP), hodi hetan orsamentu ho montante rihun $1,100, hodi sosa nessesidade bázika fahe ba estudante sira ne’ebé hela iha “kost”, durante implementasaun serka sanitária no inundasaun ne’ebé akontese iha 4 abril foin lalais ne’e.

“Totál benefisiáriu ne’ebé hetan apoiu hamutuk 30. Apoiu nesesidade bázika hanesan, fós, supermie, mina tein no masin-midar no ho apoia ne’e, hodi sira han no auguenta ba loron ida rua nian. ACF servisu CSEP no koopera ho Mahon Training Center, ami hamutuk hodi distribui nesesidade báziku iha fulan maiu foin lalais ne’e,” nia dehan.

Totál funsionáriu hosi Sentru Formasaun Action for Change Foundation (ACF), hamutuk na’in-neen (6), formadór nain neen (6), enkuantu totál ba formandu ne’ebé tuir formasaun hahú hosi tinan 2010 to’o 2021 hamutuk 10,500.

Jullu, ACF reativa formasaun

Entretantu, Diretora ne’e hateten tuir planu iha fulan jullu tinan 2021 ne’e, sentru formasaun ACF sei reativa hikas formasaun.

“Hanesan foin lalais, ita-nia Governu fó sai katak atividade hotu iha Díli laran hahú normal hikas ona, tanbá ne’e ACF mós hahú ona preparasaun iha fulan jullu kontinua reativa fali atividade formasaun sira-ne’ebé durante ne’e lala’o,” Veronica de Sousa hateten.

Bainhira reativa Sentru Formasaun ne’e, ACF sei fó sai avizu liuhosi WhatsAp ba formandu sira, hodi fila-fali mai tuir formasaun.

“Formandu ne’ebé tuir formasaun iha tinan 2021 hamutuk na’in 60 ne’ebé ativu hela, no ami sei fó sai avizu liuhosi WhassAp no via telefónika, hodi informa ba sira atu fila-fali mai tuir formasaun. Maibé ba sira-ne’ebé iha munisípiu ami nafatin hein, no ami mós sei fó sai avizu foun ba estudante foun karik iha interese atu mai tuir formasaun iha sentru ne’e,” nia dehan.

Atividade formasaun iha tinan 2021, ACF hahú iha janeiru, maibé bainhira Governu implementa regra serka sanitária no konfinamentu obrigatóriu, entaun iha fulan febreiru ACF deside formandu sira hela iha uma, hodi kontinua akompaña formadór ida-idak nian, liuhosi whatsAapp grupu ne’ebé iha ona, hodi halo diskusaun entre formadór no formandu sira.

“Área formasaun ba tinan 2021 hanesan lian inglés, português, komputadór, no públik management,” nia dehan.

Sentru Formasaun Action for Change Foundation (ACF), harii iha loron 17 fulan maiu 2010, antes atu muda naran ba Action for Change Foundation (ACF), iha tinan 2007 ho naran Fundasaun Hafoun Rai Timor (FHRT, sigla portugés), hafoin FHRT disolve entaun muda fila-fali vizaun no misaun hosi FHRT ba fali Action for Change Foundation (ACF).

Totál funsionáriu sira iha Sentru Formasaun Action for Change Foundation (ACF) hamutuk na’in-neen (6) no formadór nain-neen (6). Totál formandu sira-ne’ebé tuir formasaun hahú hosi tinan 2010 to’o 2021 hamutuk 10.500 no hosi númeru ne’e iha 30% mak hetan servisu ona iha Governu, 20% servisu iha empreza no Organizasaun Naun Govermentál (NGO).

Jornalista : Nelia Fernandes 

Editór       : Cancio Ximenes

HAKEREK NO HATÁN

Please enter your comment!
Please enter your name here