Eskola Sekundária Téknika Vokasionál Ekonomia no Komérsiu, Becora. Imajen TATOLI/Nelia Fernandes

DILI, 27 juñu 2021 (TATOLI)—Diretór Eskola Sekundária Téknika Vokasionál Ekonomia no Komérsiu, Becora, Francisco Guterres, hateten, parte eskola hasoru difikuldade asesu fundu tranferénsia públika hamutuk $500.000 hosi Ministériu Edukasaun Juventude no Desportu (MEJD), ne’ebé parte eskola sei utiliza ba dezenvolvimentu no nesesidade eskola.

“Orsamentu $500.000 ne’ebé ministériu prevee sei uza responde atividade manutensaun no reabilitasaun eskola, halo pekena akizisaun ba livru manuál balun inklui formasaun no kapasitasaun profesór sira, maibé ami labele foti osan ne’e tanba laiha dalan. Tanba ne’e, ami husu ministériu rezolve kestaun ne’e atu ami bele hadi’a buat balun iha eskola,” Diretór Eskola informa ba Agência TATOLI, iha resintu Eskola, Becora, domingo ne’e.

Nia dehan, durante ne’e parte eskola hetan apoiu fundu hosi Korea International Cooperation Agency (KOICA) hodi responde ba fasilidade eskola.

“Buat ne’ebé KOICA oferese mak eskola ezekuta to’o ohin loron, tanba ne’e husu Governu atu apoiu mós eskola, problema fundu ne’ebé paradu tenke rezolve lalais atu eskola bele dezenvolve-an di’ak liután,” nia akresenta.

Responsável eskola ne’e haktuir, relasiona ho kestaun ne’e parte eskola konfirma ona ba parte jurídiku MEJD.

“Sira dehan akordu la vale ona, tanba ne’e ami hato’o pedidu ba Diresaun Finansa no  daudaun sei iha hela prosesu renovasaun akordu atu loke dalan bele asesu fali fundu, maibé bainhira seidauk halo renovasaun, ami labele foti osan,” Diretór Eskola hatutan.

MEJD aloka orsamentu $111.478.459 ba tinan 2021, ne’ebé kompostu hosi saláriu no vensimentu purvolta $61.628.121, bens no servisu $16.650.131, kapitál menór $2.995.700, kapitál dezenvolvimentu $7.015.951, tranferénsia públika $23.188.556.

Ba tinan ne’e MEJD konsentra ba programa prioridade sira hanesan governasaun di’ak no jestaun institusionál, hadi’a sistema ensinu pre-eskolár, báziku, sekundária no ensinu rekorente, hadi’a infraestrutura bázika, promove kualidade profesór sira no seluk tan.

Jornalista : Tomé Amado

Editora     : Julia Chatarina

HAKEREK NO HATÁN

Please enter your comment!
Please enter your name here