Sekretária Estadu Igualdade no Inklusaun, Maria Jose da Fonseca Monteiro de Jesus. Imajen TATOLI/ Egas Cristovão.

DILI, 25 juñu 2021 (TATOLI)—Sekretária Estadu Igualdade Inkluzaun (SEII), Maria José da Fonseca Monteiro de Jesus, informa iha primeiru trimester (janeiru-marsu) ne’e SEII ezekuta ona Orsamentu Jerál Estadu (OJE) 2021 hamutuk 28%, hosi montante millaun $2,4.

“Totál ezekusaun OJE 2021 nian hahú fulan janeiru-marsu, ita ezekuta ona 28%,” Maria José da Fonseca Monteiro de Jesus hateten ba Ajénsia TATOLI, iha nia knaar fatin Obrigado Barack, Dili, kinta ne’e.

Hosi ezekusaun 28% ne’e, kada kategória hanesan saláriu no vensimentu hamutuk rihun $199 (36%), bens servisu rihun $463 (44%), no kapitál menór no tranferénsia públika sei zero. 

Durante períodu ka trimestre dahuluk nian, SEII iha dezafiu boot tanba situasaun pandemia COVID-19 no dezastre naturál, entaun programa balun labele la’o maibé iha periódu daruak ne’e SEII kontinua hala’o programa ne’ebé seidauk la’o iha tinan kotuk inklui periódu dahuluk nian.

“Devia ita halo ona rekrutamentu ba funsionáriu sira iha periódu dahuluk ne’e maibé serka sanitária no konfinamentu domisiliáriu mak ita labele realiza. Maibé iha periódu daruak ami hahú ona anúnsia vaga ba públiku nune’e hodi haforsa servisu iha munisípiu sira,” nia esplika.

Iha ámbitu serka sanitaria ne’e, ekipa sosiu ekonómiku aumenta barak tanba ne’e ekipa nasionál kontinua enkoraja grupu sira atu hametin no haforsa liután sira-nia negósiu sira hanesan faan naan fresku, loke alfaiate no seluk tan.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here