Aprezentasaun progresu serbisu saúde munisípiu Bobonaro kona-bá programa luta kontra malaria, TBC no HIV, iha salaun administasaun munisipál, Holsa, Maliana, sesta (25/06/21). Imajen Tatoli/ Sérgio da Cruz.

BOBONARO, 25 juñu 2021 (TATOLI)—Ministériu Saúde (MS), liuhosi Vise-Ministru Saúde, Bonifácio Maucoli dos Reis, husu no ekonraza pesoál saúde iha munisípiu Bobonaro atu luta kombate Tuberculoze (TBC), malária no HIV-SIDA, iha munisípiu ne’e.

Bonifácio Maucoli dos Reis  husu ne’e iha aprezentasaun progresu serbisu saúde munisípiu Bobonaro kona-bá  programa luta kontra malaria, TBC no HIV, iha salaun administasaun munisipál, Holsa, Maliana, sesta ne’e.

Notísia relevante:Loron haat, sidadaun Bobonaro 2.854 simu vasina

Membru Governu ne’e husu tanba programa ne’e hetan apoiu hosi Fundu Global millaun $15,7 liu hosi Country Coordination Mecanism Timor-Leste (CCM-TL), atu apoia serbisu Ministériu Saúde, hodi elimina moras tolu ne’ebé mensiona.

“Husu pesoál saúde-sira tenke tun ba baze atu serbisu hamutuk ho autoridade lokál-sira, nune’e bele fó atendimentu di’ak ba ita-nia populasaun-sira, tanba TBC ita bele kura,” Maucoli husu.

Iha fatin hanesan diretór saúde munisípiu Bobonaro, João da Costa Barreto, hateten antes ne’e pesoál saúde-sira implementa duni programa ne’e, maibe bainhira Timor-Leste enfrenta surtu COVI-19, programa ne’e paradu tanba hotu-hotu konsentra nu’udár liña frente.

Munisípiu Bobonaro iha sentru saúde hitu, Ospitál Referál, postu saúde 25 no klínika privada rua.

Tuir dadus hosi Diresaun Serbisu Saúde Munisípiu Bobonaro, durante tinan rua (2019-2020) detekta TBC hosi diagnosa klíniku, extra pulmaun no pulmaun ho totál 276, kazu pulmaun pozitivu 161. Hosi janeiru to’o marsu 2021, kazu ho forma hotu hamutuk 49 no kazu pulmaun poztivu hamutuk 34.

Alende ne’e, iha 2020 suspeita malária ne’ebé teste parasitonogia na’in 11.263, kazu zero, no iha 2021 hahú hosi Janeiru to’o maiu suspeita na’in 1.249 kazu zero.

Kona-bá HIV, iha 2020 detekta kazu 14, hahú hosi janeiru to’o maiu 2021 iha kazu rua. Dezde 2009 to’o 2021, Bobonaro rejista óbitu 26 Drop Out (DO) 20, na’in 43 halo hela tratamentu no hosi kazu DO iha na’in-sia halai ba Indonézia.

Presija reforsa serbisu iha fronteira

Iha programa luta kontra Malaria, TBC no HIV, sosiedade sivíl hamutuk ho Country Coordination Mechanism (CCM), hola parte hanesan ekipa ne’ebé halo observasaun no fiskalizasaun ba implementasaun programa ne’e.

Iha Observasaun Sosiedade sivil nota katak, komunidade seidauk hetan tratamentu saúde kona-bá TBC no HIV, nune’e moras ne’e kontinua eziste iha Timor-Leste, alende ne’e iha nasaun viziñu Indonézia kazu HIV kontinua aas, tanba ne’e husu Governu atu reforsa seguransa iha Fronteira.

Reprezenta sosiedade siviíl no CCM oversyght Commite, Inês Lopes hateten ba Jornalista-sira, iha edifísiu autoridade munisipál Bobonaro, sesta ne’e.

Vise Prezidente oversight visiti CCM-TL, Padre Francisco Barreto, esplika obejetivu hosi Fundu Global fó apoiu ba TL liu hosi programa ne’e atu elimina moras TBC, HIV no malaria.

Tanba ne’e nia husu ba Ministériu Saúde esforsu makás iha programa ne’e, atu utiliza fundu ne’e to’o objetivu nune’e bele hetan tan apoiu hosi Fundu Globál.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here