Estudante eskola Ensinu Báziku Esperança da Pátria, Becora, Dili. Imajen TATOLI/Egas Cristóvão

DILI, 25 juñu 2021 (TATOLI)–Ministru Edukasaun, Juventude no Desportu (MEJD), Armindo Maia, simu ona karta hosi edukasaun munisipál Bobonaro no Covalima kona-ba reativa prosesu aprendizajen, hafoin hakotu Serka Sanitária iha munisípiu rua ne’e, maibé sei tetu didi’ak.

“Loos duni Governu hasai ona Serka Sanitária iha munisípiu rua ne’e, maibé ami sei tetu hela karik bele halo prosesu aprendizajen prezensiál, maski sira haruka ona karta mai maibé ami sei haree tanba rekezitu ida mak profesór no estudante idade 18 ba leten tenke vasina,” Ministru relata hafoin hasoru malu ho Primeiru-Ministru (PM), Taur Matan Ruak, iha Rezidénsia Farol, sesta ne’e.

Notísia relevante: Governu mantein Serka Sanitária iha Baucau-Dili no hakotu Bobonaro-Covalima

Ministru haktuir, hainhira halo vizita bá Bobonaro no Covalima iha semana kotuk, identifika katak maioria profesór seidauk vasina.

“Tanba ne’e ministériu seidauk bele foti desizaun atu reativa prosesu aprendizajen,” nia akresenta.

Maski nune’e, governante ne’e garante katak bainhira reativa prosesu aprendizajen, parte ministériu sei ajuda eskola hodi prepara fasilidade sanitária prevensaun COVID-19.

“Ami serbisu hamutuk ho parseiru sira atu prepara fasilidade, liuliu máskara ne’ebé uza dala-ida tenke soe ona, maibé hasoru difikuldade balun tanba haree ba númeru estudante iha territóriu Timór kuaze 400.000, ne’ebé kada loron presiza máskara, nune’e ha’u hanoin buat ida la’ós fásil maibé ami esforsu,” nia akresenta.

Biban ne’e, Ministru apela ba profesór sira hotu inklui estudante ho idade 18 ba leten, tenke hakbesik-an ba sentru vasinasaun hodi simu vasina, nune’e bele reativa prosesu aprendizajen prezensiál, maibé kuandu maioria seidauk vasina signifika seidauk bele reativa aula.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here