Komandante Polísia Nasionál Timor-Leste (PNTL) Munisípiu Viqueque, Superintendente Sebestião Alves Quintão. Imajen Tatoli/Vitorino Lopes da Costa

DILI, 25 juñu 2021 (TATOLI)—Inan-feton ida ho inisiál QM lori tudik ko’a-kotu MS (37), hanesan la’en no suspeitu nia ‘fatin-lulik’, bainhira obriga hodi halo relasaun seksuál ho oan feto-rasik AJSM (13), iha aldeia Krarek Naruk, suku Uma-Tolu, postu administrativu Lakluta, munisípiu Viqueque, kuarta (23/06/21).

Komandante Polísia Nasionál Timor-Leste (PNTL) munisípiu Viqueque, Superintendente Sebastião Alves informa, hafoin akontesimentu, polísia to’o kedan iha fatin hodi halo investigasaun, no evakua kedan vítima ba Ospitál Viqueque, no kontinua transfere ba Ospitál  Baucau.

Notísia relevante:Situasaun seguransa iha Viqueque kontroladu

Alende ne’e, polísia mós detein kedan suspeitu QM, hodi halo investigasaun durante oras 72, enkuantu vítima AJSM, transporta kedan ba uma mahon, hodi hetan konsolasaun espirituál.

“Loos duni, kazu ne’e akontese ona, agora ami halo ona investigasaun no aprezenta ba Ministériu Públiku (MP), hodi submete ba Tribunál Baucau,” Superintendente, Sebastião Alves, hateten ba jornalista Agência Tatoli, via telefónika, sesta ne’e.

Tuir dadus ne’ebé PNTL Viqueuque rekolla, suspeitu QM ko’a nia-kaben MS-nia ‘fatin-lulik’, tanba lamenta no trauma bainhira haree direta MS obriga no halo relasaun seksuál hasoru oan feto-rasik AJSM ho kondisaun trauma.

Parte PNTL Viqueque to’o kedan iha fatin akontesimentu tanba hetan kontaktu ka keixa hosi família no viziñu.

Iha parte seluk, Portavóz Komandu Jerál PNTL, Superintendente Xefe, Arnaldo de Araújo husu ba Komandu Viqueque, atu halo investigasaun kle’an ba kazu ne’e, no buka koordena ho uma mahon-sira atu bele tau-matan ba vítima.

Jornalista : Eugénio Pereira

Editór       : Cipriano Colo

1 KOMENTÁRIU

  1. Hakarak klarifika deit katak administrativamente Suco Uma-Tolu ne’e pertense ba Posto Administrativo Lacluta, la’ós Posto Administrativo Viqueque Vila. Obrigadu

HAKEREK NO HATÁN

Please enter your comment!
Please enter your name here