Komunidade Seloi Kraik, Aileu Vila simu vasina AstraZeneca doze dahuluk, hafoin Ministru ba Asuntu Parlamentár no Komunikasaun Sosiál, Francisco Jerónimo, halo lansamentu programa vasinasaun iha suku refere. Imajen Tatoli/Evaristo Soares Martins.

AILEU, 24 juñu 2021 (TATOLI)—Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, kinta ne’e halo lansamentu ba programa vasinasaun ba komunidade suku Seloi Kraik, postu administrativu Aileu Vila, munisípiu Aileu.

Ministru Francisco Jerónimo hamutuk ho Ministériu Saúde no liña frente sira halo lansamentu programa vasinasaun no halo sensibilizasaun prevensaun hasoru COVID-19 ba komunidade Seloi Kraik tanba governante ne’e responsabiliza munisípiu Aileu no Manatuto.

“Kada semana, ha’u sempre ba munisípiu rua ne’e inklui Aileu hodi tau matan ba polítika Estadu nian relasiona vasina nasionál, katak ema hotu-hotu ho idade 18 ba leten atu simu vasina. Ne’e nu’udar progarama nasionál no program ida-ne’e la’ós halo iha Timor maibé programa ne’e aplika iha nasaun hotu-hotu ne’ebé afeta COVID-19. Maibé nasaun 165 mak uza vasina AstraZeneca inklui Timor-Leste,” Ministru Francisco Jerónimo, apela ba komunidade sira bainhira lansa programa vasinasaun AstraZeneca, iha Seloi Kraik.

Tanba ne’e, Estadu Timor-Leste foti desizaun katak atu proteje komunidade hosi COVID-19 entaun dalan únika mak tenke vasina.

“Ita bele iha métodu oioin, ita bele deklara estadu emerjénsia, ita bele deklara serka sanitária, ita bele deklara konfinamentu obrigatóriu, nune’e ema hotu labele sai hosi uma hodi mitiga moras ida-ne’e. Maibé seidauk to’o atu rezolve problema ida-ne’e. Unika vasina mak bele rezolve,” nia dehan.

Governante ne’e informa ba komunidade sira katak deklarasaun polítika Estadu nian mak bainhira ema-ida simu vasina dala-rua, nia bele sai hosi Aileu ba Dili no nia bele sai hosi Dili ba munisípiu sira seluk.

“La presiza teste swab, importante mak uza maskára, fase-liman beibeik ho sabaun no kontinua kumpre distansiamentu sosiál. Tanba ne’e mak membru Governu hotu simu ona vasina dala-rua sai hosi Dili ba iha fatin hotu hodi sensibiliza importánsia hosi programa vasinasaun ne’e,” nia hateten.

Entretantu Xefe Departamentu Promosaun Saúde Munisípiu Aileu, Anabela Andrade, fó hanoin ba komunidade sira katak imunizasaun ne’e importante hodi proteje “ita-nia aan, família no komunidade”.

“Vasina ne’e la’ós aimoruk maibé vasiona ne’e hanesan substánsia kímiku ida-ne’ebé tama ba ita-nia isin lolon hodi kontra COVID-19,” Anabela Andrade hateten ba komunidade.

Nia husu komunidade atu hakbesik ba sentru saúde ne’ebé besik hodi simu vasina tanba vasina ne’e atu haforsa ema idak-idak nia imunidade hodi kontra propagasaun surtu COVID-19.

Tuir observasaun hosi Agência TATOLI, nota xefe suku sira iha Postu Administrativu Aileu nian partisipa iha lansamentu programa vasinasaun iha Seloi Kraik, no hosi parte Suku Seloi Kraik nian partisipa hosi xefe aldeia 10 hosi suku refere no komunidade hosi suku refere.

Hafoin lansamentu, ekipa liña frente saúde munisípiu Aileu nian halo kedas vasina ba komunidade aldeia 10 iha suku Seloi Kraik ne’ebé lokaliza iha Postu Administrativu Aileu vila ne’e.

Jornalista : Evaristo Soares

Editór       : Cancio Ximenes

HAKEREK NO HATÁN

Please enter your comment!
Please enter your name here