Imajen/OMS

VIQUEQUE, 24 juñu 2021 (TATOLI)- Fundasaun Klibur Domin (FKD) servisu hamutuk ho Ministériu Saúde (MS), kinta ne’e, iha sentru saúde postu administrativu Uatulari, Viqueque,  halo sensibilizasaun kona-ba perigu hosi moras tuberkuloze ba autoridade komunitáriu-sira.

Tuberkuloze (TB) kauza hosi baktéria (Mycobacterium Tuberculosis) ne’ebé maka dala barak afeta pulmaun. TB bele kura no prevene.

TB espalla hosi ema ida ba ema seluk liu hosi ár. Bainhira ema ida sofre moras TB mear, fani ka tafui, sira mós espalla mikróbiu TB nian ba iha ár livre. Bainhira dada-iis mikróbiu oituan de’it, ema bele infetadu ho moras TB.

Ofisial FKD, Alberto Marcarenhas, esplika sensibilizasaun TB ba lider komunitáriu-sira tanba moras ne’e risku tebes atu da’et ba ema. Tan ne’e mak partilla informasaun ba lideransa suku sira hodi bele hatene moras ne’e.

“Dala barak ema hosi nasaun dezenvolvidu-sira sempre hateten katak moras TB ema ki’ak sira nian. Ho ida ne’e mak ami konvida lider komunitária sira fahe informasaun kona-ba TB no  oinsá ita bele hamenus tasa taxa mortalidade nian,” Alberto Marcarenhas hateten.

Dadus tuberkulozu iha Timor-Leste tomak ba kazu konfirma pozitivu totál 460.65 por 100 abitante, signifika katak iha TL númeru tuberkulozu boot liu kompara ho nasaun Asia no  Pasífiku.

Tuir dadus iha Postu Saúde Uatulari rejista kazu pozitivu tuberkulozu tinan 2021 hosi suku neen nian hanesan Suku Macadique hamutuk na’in-27, Uaitame hamutuk na’in-hitu (7), Matahoi na’in-23, Vessoru na’in-ualu (8), Babulo na’in-11 no Suku Afaloicai na’in-20 totál na’in-97.

Iha fatin hanesan Xefe Suku Matahoi, António Amaral, hato’o  agradese ba FKD tanba bele dezmina ona informasaun kona-ba moras tuberkulozu ba autoridade sira hodi hatutan ba komunidade sira tanba durante menus informasaun ba tuberkulozu.

Sira rekomenda ba  Governu tau mós fundu ba moras tuberkulozu hodi halo sensibilizasaun tanba durante ne’e populasaun iha área remota la hatene perigu no oinsa halo prevensaun ba  moras tuberkulozu.

Jornalista       : Vitorino Lopes da Costa
Editór             : Francisco Simões

HAKEREK NO HATÁN

Please enter your comment!
Please enter your name here