Komunidade iha Dili kontinua hala’o teste swab hodi fila ba munisípiu, tersa (22/06/21). Imajen Tatoli/António Gonçalves.

DILI, 24 juñu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 46, rekoperadu  131 no kazu ativu 900.

“Totál óbitu Timoroan mane ida ho idade 57, hela iha suku Ritabou, Maliana,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, kinta ne’e.

Notísia relevante:COVID-19, rekoperadu 76 no ativu 986

Iha 15 juñu transfere hosi Ospitál Referénsia Maliana, ho dignoze traballu sindroma insufisiénsia respiratória aguda (SIRA), ka susar ka difisil atu dada-i’is, tanba COVID-19, rezultadu PCR pozitivu ho CT –cycle treshold – geneE 13,3, gene N2 15,3.

Matebian iha istória tuberkuloze pulmonar ho asma no me’ar, isin-manas ho iis-boot iha uma durante loron tolu molok ba konsulta iha Maliana.

Iha fatin izolamentu Vera Cruz, ekipa médika halo re-avaliasaun ba dignóstiku, no to’o iha konkluzaun katak, matebian iha Pneumonia tanba SARS-CoV-2 (Covid-19).

Matebian hetan tratamentu tuir protokolu ne’ebé iha, inklui tratamentu ho oksijéniu, liu hosi ventilasaun mekánika maibé horikalan tuku 11:20 iis-kotu tanba septic shock, respiratoric failure no multiple organ failure.

Família koordena ona ho ekipa saúde atu hala’o funerál tuir protokolu ne’ebé adopta iha Timor-Leste, iha 25 juñu iha Maliana.

Kona-bá kazu foun ohin iha 46, mai hosi Dili na’in 29 no munisípiu-sira iha 17  kompostu hosi mane 32 no feto 14.

Hosi totál kazu detetadu foun ohin, ho idade 12 mai karaik  laiha, entre tinan 12-59 na’in 45 (97,8%), idade 60 mai karaik  na’in-ida. Hosi kazu detetadu foun ohin  4,3% sintomátiku.

Kumulativu kazu konfirmadu sura hosi 21 marsu 2020 to’o 24 juñu 2021 hamutuk 8889. Hosi horisehik mai ohin, teste ne’ebé Laboratóriu Nasionál Saúde halo hamutuk 770 PCR, ho detallu hanesan tuir-mai, Vijilánsia sentinela rua,  rastreiu ba kontaktu ka Contact tracing  sia, Rastreiu Aleatóriu  ka Random Screening 69, Viájen sai-hosi serka sanitária hosi Dili 638, Viájen internasionál  haat, Follow up iha kuarentena 48.

Totál testes PCR ne’ebé halo horisehik iha munisípiu-sira seluk, RAEOA no HNGV hamutuk 261 ho  detalla hanesan tuir-mai, Maubisse 46, Maliana 14, Viqueque 15, Suai 26,  Baucau 76, Ermera 68, RAEOA  sia no HNGV na’in-ualu.

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 4,2/100 mil abitante, enkuantu ba de’it munisípiu Díli 8,0/100 mil abitante.

Maski insidénsia nasionál no iha munisípiu Dili redúz maka’as iha semana ida ikus, insidénsia ohin nian hatudu katak, Munisípiu Baucau mak agora fatin ho risku bo’ot liu atu populasaun hetan da’et no hada’et tutuan virus SARS-CoV-2, ho taxa insidénsia 11,4/100 mil abitantes, tuir kedas ho Munisípiu Dili, hafoin Munisípiu Manatuto (7,8/100 mil abitantes).

Informasaun hosi izolamentu

Iha 24 juñu 2021, izolamentu Vera Cruz halo tratamentu ba kazu detetadu na’in 17, iha área obstetrisia na’in-rua no iha medisina interna na’in 15.

Iha obstetrisia  na’in-rua kategoria leve (mild)hotu. Iha área medisina interna na’in 15. Ida grave ka kritiku uza ventiladór  nain-tolu moderadu  na’in 11 leve mild.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Hahú  02 juñu  2021, ema ne’ebé rekoperadu ona hosi moras COVID-19 no liu ona hosi izolamentu terapéutiku domisiliár iha uma-rasik ka iha fatin ne’ebé estadu prepara, bainhira atu dezloka sai husi ka tama ba serka sanitária, la presiza  halo swab, maibé nafatin presiza hetan autorizasaun esepsionál hosi Diretór SIJK.

Atu bele prosesa autorizasaun esepsionál tenki hatudu sertifikadu alta hosi izolamentu, ne’ebé Ministériu Saúde, liu hosi ninia Pilár hitu, fó ba ema rekoperadu.

Apelu

Apela ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira-ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here