Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen TATOLI/Egas Cristóvão

DILI, 23 juñu 2021 (TATOLI)–Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten, prontu koopera ho Sekretariadu Tékniku Adminsitrasaun Eleitorál (STAE) atu halo resensiamentu eleitorál ba timor-oan iha diaspora atubele tuir votasaun Eleisaun Presidensiál ne’ebé sei realiza iha marsu 2022.

“Ami sempre prontu  ajuda Ministériu Administrasaun Estatál (MAE) no STAE atu halo resesiamentu eleitorál iha país ne’ebé timor-oan barak hanesan Koreia Súl, Austrália, Portugal, Inglatera, Irlanda no Indonézia,” Ministra  Adaljiza hateten iha Palasiu Governu, kuarta ne’e.

Tuir planu, STAE sei halo lansamentu resensiamentu eleitorál iha rai-laran no diáspora iha fulan setembru.

Nune’e, MNEK hahú ona komunika Embaixadór Timor-Leste iha rai-li’ur atubele tuir prosesu resensiamentu eleitorál.

“Ami iha ona pontu fokál atu ajuda tékniku sira hosi STAE atu halo resensiamentu eleitorál iha diáspora, liu-liu fasilita atu dezloka ba país sira ne’e atu halo resensiamentu,” nia akresenta.

Tuir Ministra, ekipa sira iha rai-li’ur nafatin tuir protokolu saúde no kumpre kuarentena atu  fasilita prosesu resensiamentu to’o votasaun.

ornalista : Florêncio Miranda Ximenes

Editora    : Julia Chatarina

HAKEREK NO HATÁN

Please enter your comment!
Please enter your name here