Pesoál saúde fó vasina ba abitante, iha sentru saúde iha Dili. Imajen TATOLI/António Gonçalves

DILI, 23 juñu 2021 (TATOLI)—Governu liuhosi reuniaun Konsellu Ministru (KM), iha kuarta ne’e aprova Projetu Dekretu-Lei ba kriasaun sorteiu ‘Lotaria Vasina Kontra COVID-19’, ne’ebé aprezenta hosi Ministru Finansa, Rui Augusto Gomes, ho objetivu insentiva vasinasaun.

“Sorteiu ne’e konsiste iha atribuisaun prémiu, ho forma eventuál ba ema singulár sira ne’ebé validamente partisipa iha sorteiu,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, kuarta ne’e.

Tanba ne’e, Portavóz Governu konvida publiku atu partisipa másimu iha kampaña vasina iha territóriu nasionál, nune’e bele automátikamente tuir sorteiu ne’e.

Atividade ne’e sei hahú iha fulan-jullu, iha loron 01 to’o 20 kada fulan, ne’ebé kada prémiu ho valór $100 no sorteiu ne’e sei hala’o kada fulan iha suku.

“Númeru prémiu ne’ebé atribui hosi kada sorteiu, depende ba númeru ema ne’ebé vasina ona iha área suku laran,” governante ne’e esplika.

Entre ema 50 no 150 iha suku ne’ebé vasina ona iha fulan ida mak bele realiza sorteiu no atribui prémiu, ne’ebé entre ema 151 to’o 300 ne’ebé simu ona vasina, sei tama sorteiu no iha oportunidade ba prémiu tolu, entre ema 301 no 500 ba prémiu neen no ema 501 ba leten ne’ebé simu ona vasina fulan ne’e sei tama sorteiu no iha oportunidade ba prémiu sia.

Nune’e, bainhira loron determinadu maka partisipasaun vasina menus hosi ema 50, maka sei laiha sorteiu no númeru hirak ne’e sei integra fali ba fulan tuir mai.

Biban ne’e, KM aprova ona alterasaun dahuluk ba Rezolusaun Governu ne’ebé define objetivu ba kampaña vasinasaun no orienta atu asegura kumprimentu medida preventiva ne’ebé Governu estabelese ona.

Alterasaun ne’e ho objetivu atu alkansa kampaña vasinasaun 10.000 iha loron ida iha nível nasionál, ne’ebé orienta departementu relevante sira iha sentidu atu kria mekanizmu nesesáriu atu aselera ritmu vasinasaun.

Aleinde ne’e, Vise Primeiru-Ministru no Ministra Solidaridade Sosiál no Inkluzasaun (MSSI), Armanda Berta dos Santos no Ministra Saúde, Odete Maria Freitas Belo, hamutuk ho responsável ba Komisaun Interministeriál ba Elaborasaun no Koordenasaun Ezekusaun Planu Vasinasaun kontra COVID-19, aprezenta ba KM kona-ba pontu situasaun prosesu akizisaun vasina no implementasaun kampaña vasinasaun.

To’o agora Timor-Leste simu ona vasina hamutuk 294.000, ne’ebé hosi numeru ne’e, 144.380 maka fó vasina ona no agora iha hela stock ho totál vasina hamutuk 149.620.

iha loron 30 juñu mai, vasina ne’ebé maka oferese hosi Austrália sei to’o no Timor-Leste buka mekanizmu atu asesu liuhosi sosa ka simu doasaun hosi entidade no parseiru sira, vasina ba populasaun ho idade menus husi 18.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here