Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (23/06). Imajen TATOLI/Egas Cristóvão

DILI, 23 juñu 2021 (TATOLI)—Governu liuhosi reuniaun Konsellu Ministru aprova autorizasaun ba abertura prosedimentu aprovizionamentu konkursu públiku ba akizisaun ró peska industriál na’in-rua, ho kapasidade 250 GT.

Proposta ne’e aprezenta hosi Sekretáriu Estadu Peska, Elídio de Araújo.

“Akizisaun ba ró hirak ne’e hakarak kontribui ba dezenvolvimentu iha setór peska nasionál, ho objetivu prinsipál atu hasa’e kuantidade ikan ne’ebé peska,” Ministru Prezidénsia Konsellu Ministru, Prezidénsia Konsellu Ministru, Fidelis Manuel Leite Magalhães, hafoin reuniaun ezekutivu, iha Palásiu Governu, kuarta ne’e.

Aleinde ne’e, bele hamenus presu ikan iha merkadu nasionál, hametin soberania marítima nasionál, hapara peska ilegál no asegura autilizasaun rekursu peskueiru, ho forma rsponsável no sustentável ba futuru. 

Antes ne’e, Sekretaria Estadu Peska (SEP) propoin ró peska hamutuk 110 atu sosa iha tinan 2021 nia laran.

Governu konsege sosa ró ba peskadór hamutuk unidade 38, ne’ebé sei distribui ba munisípiu 10, kompostu hosi Lautém tolu, Baucau neen, Manatuto ida, Same ualu, Ainaro rua, Dili sanulu, Liquiçá ida, Maliana hitu no Suai no Viqueque maka seidauk distribui.

Polítika SEP tinan 2021  maka kontinua nafatin fó prioridade ba peskadór iha munisípiu 10, ne’ebé kada munisípiu sei hetan ró 10, maibé Aileu no Ermera  mak lae tanba laiha tasi.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here