Prezidente ACCCTO, Kathleen Gonçalves, reprezenta Asosiasaun Xineza Timor-oan Sydney, Tony Vong, entrega apoiu aihan ba GAAC-PR liuhosi Espoza Prezidente Repúblika, Cidália Nobre Lopes Mouzinho Guterres, iha Palásiu Prezidensiál, sesta (04/05). Imajen/Mídia PR.

DILI23 juñu 2021 (TATOLI)—Espoza Prezidente Repúblika, Cidália Nobre Lopes Mouzinho Guterres, tersa ne’e hala’o vizita no fó apoiu umanitária ba ema ho defisiénsia sira liuliu defisiente matan iha Asosiasaun Halibur Defisiénsia Matan Timor-Leste (AHDMTL).

“Apoiu ai-han ne’e Asosiasaun Komersiál Komunidade Xineza Timoroan (ACCCTO) entrega ba Gabinete Apoio à Actividade do Conjuge do Presidente da República (GAAC-PR) dala tolu ona. Ohin sira fó tan, ami lori apoiu uitoan ba maun alin sira iha Asosiasaun Halibur Defisiénsia Matan Timor Leste (AHDMTL),” Espoza PR ne’e hateten ba jornalista sira iha Irmãs de Caridade de Nossa Senhora Mãe de Misericordia (SCMM), hafoin vizita Asosiasaun Halibur Defisiénsia Matan Timor-Leste (AHDMTL), iha Manleuana, Díli, ohin.

Apoiu ne’e Espoza Prezidente sei kontribui fó nafatin ba komunidade sira hodi hein Governu hala’o servisu, hodi atende ba komunidade ne’ebé kbiit laek ne’ebé presiza tulun. Atividade ne’e la’ós hala’o iha Dili de’it maibé hala’o mós iha Munisípiu sira.

“Espera ho serka sanitária ne’e ramata no ema hotu simu vasina, ita bele halo atividade hodi kumpre nafatin protokolu saúde ni’an. Ema ne’ebé hamlaha no komunidade sira presiza ne’e tenke fó apoiu duni, labele dada no labele he’in fali tempu atu fó apoiu. Tanbá ida-ne’e, nesesidade ida-ne’ebé urjente no importante tenke hatán duni,” nia hateten.

Iha biban ne’e, Prezidente Konsellu Fiskál Asosiasaun Halibur Defisiénsia Matan Timor-Leste (AHDMTL), Gilberta dos Santos Pereira, hateten sente orgullu no kontente ba vizita hosi Espoza Prezidente Repúblika.

Tanbá, nia dehan, durante ezistésia AHDMTL atu tama ona ba tinan 10 maibé foin primeira vez, inan ba nasaun bele vizita fatin ida-ne’e hodi hatene kle’an saida mak ema ho defisiénsia matan hasoru. 

“Ami Asosiasaun Halibur Defisiénsia Matan Timor-Leste agradese. Ha’u pesoál, orgullu tanba iha biban ida-ne’e, Espoza PR bele sente no hatene mós ema defisiente matan nia rezisténsia luta, durante sira-nia esforsu ba sira-nia moris ida-ne’e,” Gilberta dos Santos Pereira hateten.

AHDMTL nia esperansa, Estadu bele haree no proteje labarik sira liuliu labarik ho defisiénsia tanbá sira-ne’e risku boot tebes bele hetan violénsia ka aktu violênsia sira seluk, tanbá ema ho defisiénsia ne’e risku boot.

“Governu tenke tau atensaun másimu. Bainhira iha programa ruma karik, bele tau konsiderasaun ba labarik defisiente sira-ne’e,” nia dehan.

Enkuantu, totál ema ho defisiensia matan iha AHDMTL ne’e hamutuk na’in-60, kompostu hosi feto na’in-33 no mane na’in-27, no labarik kiik ho defisiente matan hamutuk na’in-20 resin.

Apoiu umanitária ne’ebé Espoza Prezidente Repúblika entrega ba AHDMTL ne’e kompostu hosi foos saka 15, supermie dos 15 no mina litru ruan nian dos lima (5).

Entretantu, Reprezentante Irmãs de Caridade de Nossa Senhora Mãe de Misericordia (SCMM), Irmã Esmenia Sanshes da Silva, hateten apoiu umanitariu ne’ebé simu hosi espoza PR ne’e, sira-nia parte sei apoiu tutan ba komunidade kbiit laek sira-ne’ebé hela iha Manleuana ne’e.

Hosi apoiu ai-han ne’ebé hetan hosi Espoza Prezidente Repúblika ne’e, atu utiliza ba komunidade sira-ne’ebé to’o agora sei hela nafatin iha sentru akollimentu Manleuana nian tanba laiha uma.

“Ami-nia parte hakarak fó kontribuisaun ba sira ne’e liuhosi buat ne’ebé Espoza Prezidente Repúblika fó atu fahe ba sira, ne’e misaun karidade,” madre ne’e hateten.

Entretantu, apoiu hosi Espoza Prezidente Repúblika fó ba Madre SCMM hanesan foos ska 20, supermie dos 20 no mina litru tolu dos hitu (7). Totál hosi Irmãs de Caridade de Nossa Senhora Mãe de Misericordia (SCMM) hamutuk na’in 34, kompostu hosi komunidade madre iha Akadiruhun no Ossú-Viqueque.

Prezidente Asosiasaun Komersiál Komunidade Xineza Timoroan (ACCCTO), Kathleen Guterres, hateten komunidade Xineza Timor-Leste entrega foos saka 100 no supermie dos 100 ba Gabinete Espoza PR atu atribui ba komunidade ne’ebé afeta ba dezastre naturál no ema-ne’ebé susar iha situasaun COVID-19 nia-laran.

Nia hatutan, maske sasán uitoaun maibé ida-ne’e mak komunidade Xineza Timoroan i ne’ebé hela iha rai-liur (Austália) nia kontribuisaun hodi tulun maluk afetadu ne’ebé presiza duni.

Apoiu ida-ne’e la’ós apoiu ikus ba populasaun afetadu sira maibé komunidade Timor-oan iha rai-li’ur mós nafatin esforsu karik sei iha posibilidade ka forsa atu fó tulun nafatin.

Jornalista : Nelia Fernandes/Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here