Diretór Centru Formasaun Profisionál Don Bosco Comoro (CFP-DBC), Adriano Maria de Jesus, SDB. Imajen TATOLI/Domingos Piedade Freitas.

DILI22 juñu 2021 (TATOLI)—Diretór Sentru Formasaun Profisionál (CFP-sigla portugés) Don Bosco Comoro, Irmaun Adriano Maria de Jesus, SDB, hateten nia parte hein desizaun hosi Governu liu-liu Ministériu Edukasaun Juventude no Desportu (MEJD) atu reativa ensinu aprendizajen iha eskola, nune’e sentru formasaun ne’e bele reativa formasaun ba formandu sira.

“Ami hein hela, kuandu serka sanitária ne’e hakotu ona, ami bele hahú fali kursu ne’e. Tanba kursu ne’e, ami hahú tiha ona iha fulan-janeiru, maibé iha fulan-marsu suspende tiha tanbá pandemia COVID-19. Agora, ami hein desizaun Governu atu reativa ensinu aprendizajen, nune’e ami bele hahú fali formasaun ba formandu sira,” Irmaun Adriano Maria de Jesus hateten ba Agência Tatoli, iha nia knaar fatin Comoro, Díli, ohin.

Diretór ne’e hateten, iha tinan ne’e (2021) formandu ne’ebé tuir formasaun iha sentru formasaun refere hamutuk 174, ne’ebé agora daudaun hein hela bainhira mak formasaun ne’e hahú fali.

“Tanbá situasaun pandemia COVID-19, atividade no formasaun ne’e suspende to’o ohin loron,” nia dehan.

Sentru Formasaun Profisionál Don Bosco Comoro (CFP-DBC), hahú estabelese iha tempuu okupasaun Indonézia 1991, ho espesialidade tolu mak karpintária, soldadura no eletrisidade.

Hafoin, iha 2004 sentru ne’e aumenta tan área automotif, no depois iha tinan 2006 aumenta tan Administrasaun ba feto sira no agora daudaun iha ona departamentu hitu (7).

Iha tinan 2018, sentru ne’e aumenta tan área formasaun ba konstrusaun jerál ne’ebé kompostu hosi, eletrisidade, soldadura, karpintaria, pedreiru, no kanalizasaun. Alende, iha mós formasaun ba area automotive, administrasaun no agora daudaun iha prosesu akreditasaun.

Entretantu, nia informa, iha tinan 2013 formandu ne’ebé tuir formasaun iha sentru formasaun ne’e hamutuk 176, tinan 2014 iha formandu 86, tinan 2015 iha formandu 153, tinan 2016 iha formandu 117 ne’ebé tuir formasaun iha área formasaun konstrusaun jerál, automotif no administrasaun.

Iha tinan 2019 formandu ne’ebé tuir formasaun iha sentru ne’e na’in 118, iha tinan 2020  formandu ne’ebé tuir formasaun aumenta fali ba 155 ne’ebé tuir formasaun iha área konstrusaun jerál, automotif no administrasaun.

Hosi tinan 2013 to’o tina 2021 ne’e, formandu sira-ne’ebé tuir formasaun iha sentru hamutuk 1.078 no hosi totál ne’e, formandu mesak estudante no joven de’it.

Jornalista : Nelia Fernandes

Editór       : Cancio Ximenes

 

HAKEREK NO HATÁN

Please enter your comment!
Please enter your name here