DILI, 22 juñu 2021 (TATOLI) –Sekretáriu Estadu Juventude no Desportu (SEJD), Abrão Saldanha, tersa ne’e, iha jináziu Dili, entrega karreta ida ho marka Mitsubishi ba Komité Paralímpiku Nasionál Timor-Leste (CPNTL-sigla Portugés) hodi hala’o serbisu.
“Karreta ne’e sira mak sosa duni ho apoiu ne’ebé Governu iha ba tinan kotuk sira halo ezersísiu hosi ida-ne’e mak balu sira deside hola karreta ne’e hodi fasilita sira nia servisu,” Sekretáriu Estadu Juventude no Desportu, Abrão Saldanha hateten ba Agéncia Tatoli.
Nia husu ba CPNTL atu utiliza transporte ne’e ho responsabilidade hodi hala’o serbisu no seluk tan ba interese nasaun nian hodi dezenvolve setór desportu liu-liu ba ema ho defisiente sira.
Orsamentu ne’ebé CPNTL simu hosi SEJD hamutuk $60.000-resin ba atividade CPNTL nian hotu, nune’e prepara mós ba atividade Para-Olímpiku nian inklui ba kustu operasionál sekretariadu nian.
Iha fatin hanesan Prezidente CPNTL, Isabel da Costa Fereira hateten, antes ne’e sira nia parte enfrenta difikuldade ba transporte, maibé ohin hetan ona no promete sei utiliza ho responsabilidade.
“Karreta ida-ne’e bele ajuda CPNTL atu organiza nia atividade ho di’ak liu, hanesan ajuda tula atleta sira hodi hala’o treinamentu no atividade seluk sekretariadu nian,” Isabel Fereira hateten.
Jornalista : Hortencio Sanchez
Editór : Francisco Simões
