Xefe Interinu Servisu Saúde Komunitáriu Sentru Saúde Pasabe, Caetano Guteres. Imajen Tatoli/Abilio Elo Nini.

OÉ-CUSSE, 22 JUÑU 2021 (TATOLI)—Xefe Interinu Servisu Saúde Komunitáriu Sentru Saúde Pasabe, Caetano Guterres, informa hahú hosi fulan-janeiru to’o juñu tinan 2021 ne’e moras ne’ebé rejistu aas iha Sentru Saúde Pasabe mak moras Infesaun Respiratáriu Aguda (IRA/ISP). 

“Iha janeiru-júnu tinan 2021 ne’e, ita rejista moras barak liu mak moras infesaun vias respiratóriu aguda hamutuk 604. Nia kauza, labarik ho idade tinan ualu (8) to’o 17 mak barak liu,” Caetano Guterres informa ba Agência TATOLI, iha Sentru Saúde Pasabe, tersa ne’e

Aliende moras Infesaun Respiratóriu Aguda (IRA) ne’ebé aas, iha Sentru Saúde Pasabe ne’e mós rejista moras diarea no moras infesaun kulit.

“Moras diarea hamutuk 167 no moras infesaun kulit ne’e kiik tanba tanba afeta hosi asidente. Ita-nia atendimentu, pesoál saúde sira sempre tun iha baze hodi halo sensibilizasaun ba komunidade atu bele proteje-aan hosi moras sira-ne’e,” nia hateten.

Moras IRA ne’e akontese, nia dehan, tanba kauza hosi labarik sira halimar rai-rahun ne’ebé afeta ba sira-nia saúde mak akontese inus-metin, me’ar no dada iis araska. 

Durante ne’e, pesoál saúde iha baze hala’o programa liu-liu programa SISCA no halo mobile klinika tama bairru no aldeia sira, halo sensibilizasaun kona-ba moras hirak ne’e maibé ekipa hasoru difikuldade menus transporte.

“Buat ida difikulta ami mak transporte no to’o agora sedauk iha. Iha Sntru Saúde Pasabe ne’e, uluk iha karreta multi funsaun ida maibé iha 2014 ne’e aat tiha. To’o ohin loron, ami sedauk hetan apoiu transporte,” nia dehan.

Tanba ne’e, nia propoin ba ministériu kompetente atu tau atensaun sériu ba problema sira-ne’ebé Sentru Saúde sira enfrenta no bele tau iha konsiderasaun liu-liu problema iha sentru saúde sira iha área remota.

Entretantu, totál pesoál saúde iha Sentru Saúde Pasabe hamutuk ema na’in-43 ne’ebé serví populasaun tuir sensu uma kain tinan 2015 hamutuk uma kain 1.817, ne’ebé iha suku Malelat iha uma kain 362 no suku Abani kompostu hosi aldeia Pasabe, Haemnanu no Naetuna ho totál uma kain hamutuk 1.455.

Moras Infesaun Vias Respiratória Aguda (IRA)

Moras infesaun Vias Respiratóriu Aguda (IRA) mak infesaun viral (infeksaun ne’ebé kauza hosi virus) ne’ebé akontese iha ita-nia dalan iis nian. Bainhira ita dada iis anin sei halai tuir ita-nia dalan iis nian antes to’o iha pulmaun. Normalmente ita-nia dalan iis hahú ka forma hosi Inus, Kavidade nasal (inus kuak), faringe no laringe (kanál rua ne’ebé nia lokalizasaun iha kakorok).

Anin sei pasa hosi dalan-isin hirak ne’e molok tama ba traqueia no pulmaun. Infesaun ne’ebé akontese iha ita-nia dalan-iis sei provoka ka halo ita sente susar no la konfortavél bainhira dada iis, no nu’udar konsekuénsia sei halo ita-nia isin falta anin hodi hala’o nia funsaun ho di’ak. Moras ida-ne’e fasil tebes da’et no fasil tebes atu kura.

Kauza hosi Infesaun Vias Respiratória Aguda

Moras IRA kauza hosi virus no bakteria ne’ebé invade diretamente ita-nia dalan iis liuhosi matan, inus no ibun. Virus sira-ne’ebé hamosu moras ne’e mak hanesan Rhinovirus, Coronavirus, Virus parainfluenza, no adenovirus.

Fatór sira-ne’ebé kontribui hetan moras IRA

Fatór sira-ne’ebé kontribui atu hetan moras IRA mak hanesan (1) Relasaun ho Individu; Laabarik sira-ne’ebé la simu imunizasaun, bebé ne’ebé la hetan susu hosi inan, bebé no labarik sira menór ho idade tinan ida, sistema imunolojia fraku (daya tahan tubuh lemah), má nutrisaun, moras krónika, ijiéne pesoál ne’ebé la di’ak.  

Relasiona ho Ambiente mak; Mudansa temperatura ambientál, poluisaun (rai-rahun), asinamentu (kepadatan, overcrowding), falta ventilasaun iha uma, fumadór barak (su’ar hosi sigaru bele hasa’e insidénsia ba moras ne’e) no ahi-su’ar.

Transmisaun

Moras Infesaun Vias Respiratóriu Aguda (IRA) transmite ka da’et liuhosi kontaktu direta (koali’a, fani, kabeen) ho ema ne’ebé hetan tiha ona moras ne’e.

Sintóma

Moras Infesaun Vias Respiratóriu Aguda (IRA) sei hatudu sinál no sintóma hanesan; Inus been turu no suli ka inus metin, me’ar (me’ar maran), isin kolen ka baruk, isin manas (dalaruma), garganta moras, no ulun moras (dalaruma).

Tratamentu

Tratamentu ba iha moras infesaun vias respiratóriu aguda (IRA) iha oin rua (2) mak tratamentu medikamentoza (ho aimoruk) no tratamentu non-medikamentosa (la uza ai-moruk).

Tratamentu medikamentoza (ho aimoruk): médiku sira mak sei fó aimoruk bainhira ita ba hala’o konsulta iha sentru saúde ka iha ospitál. Tratamentu non-medikamentoza (tratamentu la ho ai-moruk): tratamentu ne’ebé prátiku no ita bela halo hanesan suas ho bee manas nia su’ar, hemu bee no jus barak, deskansa barak no selu-seluk tan.

Prevensaun

Moras infesaun vias respiratóriu fasil tebes atu kona ema maibé fasil tebes mós atu prevene, sé ita iha konsiénsa no kultura saudavel. Asaun ka hahalok sira-ne’ebé ita tenke halo hodi prevene moras ne’e mak hanesan; fase liman ho sabaun, hadook aan hosi ahi-su’ar no rai-rahun, taka inus no ibun bainhira fanin ka me’ar, susu-been ekskluzivu ba bebé foin moris to’o fulan neen (6), labele fuma besik, halo vasinasaun, no kuidadu ijiéne pesoál.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here