Kondisaun estrada Beduku hafoin inundasaun iha domingu (04/04). Imajen TATOLI/António Gonçalves.

DILI, 22 juñu 2021 (TATOLI)—Diretór Jerál Obra Públika no Koordeandór ekipa task force, Rui Hernani, informa, ekipa hosi ministériu relevante sira finaliza ona dezeñu no Bill of Quantity (BoQ)  atu rekupera imediata estrada no ponte iha fatin haat, hosi fatin hitu ne’ebé hetan estragu maka’as hosi dezastre naturál ne’ebé akontese iha loron 04 abríl.

“Konsellu Administrasaun Fundu Infraestrutura (KAFI) deside ona projetu haat no entrega ona ba Komisaun Nasionál Aprovizionamentu (CNA, sigla portugés) tanba dezeñu no BoQ  finaliza ona, ne’ebé hein selesaun ba empreza atubele kontrata hodi halo mobilizasaun no rekuperasaun,” Diretór Jerál hateten ba Agência TATOLI, iha ninia knaar fatin, Mandarin, tersa ne’e.

Projetu haat ne’ebé finaliza ona dezeñu mak hanesan ponte no Estrada bá Maloa, estrada Ailok-Laran bá RTK, estrada iha Hospital Nacional Guido Valadares (HNGV) nia kotuk no estrada ne’ebé kotu iha diresaun Tibár bá Ermera.

Tuir Koordenadór grupu traballu, KAFI deside ona hodi CNA halo prosesu aprovizionamentu, ne’ebé halo selesaun ka nomea empreza ne’ebé iha kapasidade téknika no finanseira atubele halo rekuperasaun imediata.

“Ita finaliza ona dezeñu no BoQ hodi aprezenta ba KAFI no deside ona atu CNA halo prokuramentu hodi nomea empreza sira halo rekuperasaun,” Diretór Jerál ne’e akresenta.

Tuir Dirijente ne’e, empreza ida atu halo rekuperasaun presiza iha kontratu ho Governu atu fasil halo kontrolu no prosesu pagamentu.

Enkuantu, ba fatin rua ne’ebé bazeia ba desizaun KAFI, tama rekuperasaun imediata mak hanesan, estrada iha ponte CPLP bá Bebonuk ne’ebé kotu no ponte Bekusi, iha prosesu dezeñu no BoQ, hafoin finaliza mak submete ba KAFI hodi deside.

Tuir kálkulu, orsamentu ba rekuperasaun obra iha fatin hitu ho kategoria imediata, ho kustu millaun $5.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here