Sasán nesesidade bázika ne’ebé Mahon Training Center atu fahe ba estudan sira-ne’ebé hela iha kost. Imajen Tatoli/Nelia Frenandes.

DILI21 juñu 2021 (TATOLI)—Fundadór no Prezidente Fundasaun Mahon, José de Jesus hateten, aban (tersa, 22/06) Mahon Training Center sei fó apoiu nesesidade bázika ba estudante hamutuk 50 ne’ebé daudaun ne’e hela iha ‘kost’.

Fundadór no Prezidente Fundasaun Mahon, José de Jesus. Imajen Tatoli/Nelia Fernandes.

“Aban, 22 juñu, Mahon Training Center sei fahe ai-han ba estudante sira-ne’ebé hela iha kost iha Díli, hodi sustenta sira-nia moris durante tempu defisil ida-ne’e. Ita foku ba estudante sira-ne’ebé maihosi munisípiu ne’ebé hela kost no eskola iha Díli,” Jose de Jesus hateten ba Agência Tatoli, iha nia kna’ar fatin, Bairru Pite, Díli, ohin.

Apoia ne’e fó prioridade ba estudante sira-ne’ebé hela iha kost tanba dala ruma difísil atu hetan ai-han hosi sira-nia inan-aman sira hosi munisípiu, entaun inisiativa ne’e Mahon Training Center foti hodi fó apoiu no bele sustenta sira-nia moris.

Hafoin apoiu estudante 50 ne’e, sira-nia parte sei kontaktu tan estudante na’in-50 hodi mai simu sasán iha loron tuirmai. 

Sasán nesesidade bázika ne’ebé estduante sira simu mak hanesan foos, mina-te’in, supremie, masin-midar, terigu no kafé.

Antes ne’e ba faze dahuluk, Mahon Training Center fahe ona ai-han ba estudante hamutuk 70, daruak ba na’in-60, datoluk ba na’in-182, dahaat ba na’in-60, dalima ba na’in-50, daneen ba na’in-50

“Apoiu ne’e sei fahe ba estudante hamutuk na’in-850 ne’ebé sentru ne’e rejista ona,” nia dehan.

Sasán hirak ne’e maihosi Ministériu Edukasaun, Juventude no Desportu (MEJD) mak hanesan foos saka182, mina tein dos 56 no superemie dos 52. Enkuantu apoiu hosi organizasaun Spend It Well hosi Austrália mak fó apoiu sasán no ai-han hanesan foos saka 200, mina tein dos 15, kafé dos haat (4), supremie dos 200 bo Biti 100.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here