Koordenadór Ekipa Traballu Tékniku ba Identifikasaun Infraestrutura no Ekipamentu Públiku Koletivu, Benjamin Hopffer Martins. Imajen TATOLI /Egas Cristóvão

DILI, 21 juñu 2021 (TATOLI)—Koordenadór Ekipa Traballu Tékniku ba Identifikasaun Infraestrutura no Ekipamentu Públiku Koletivu, Benjamin Hopffer Martins, konsidera fatór hamosu inundasaun ho volume maka’as iha kapitál Dili mak sedimentasaun.

“Risku loloos la’ós bee sa’e, maibé sedimentasaun mak tun hodi altera sistema drainajen mota sira iha Dili laran, tanba ne’e kauza ba estragu barak. Impaktu mós hosi indisiplina komunidade tanba kee rai arbiru no halo uma iha foho lolon,” Koordenadór hateten, hafoin reuniaun ho Primeiru-Ministru (PM), Taur Matan Ruak, iha Rezidénsia Farol, segunda ne’e.

Aleinde ne’e, rai halai hahú hosi Hera no Tasi-tolu barak, halo sedimentasaun ba mota laran.

“Sedimentu sira ne’e lori problema iha área urbana sidade laran, liuliu iha ponte sira tanba dimensaun uluk dezeña la’ós atu sedimentu liu, maibé ba bee de’it, ne’ebé tinan-rua liubá kuaze rai, rai henek, fatuk, ai mai hamutuk taka koak sira ne’e,” nia haktuir.

Nune’e, ponte sira ne’ebé iha Dili laran halo bazeia ba bee dalan, ne’ebé ninia estrutura nafatin laiha ponte ida mak monu ka halai hosi fatin.

“Sedimentu sira mak sai hanesan problema prinsipál tanba satán bee no bee fakar liu fali hosi estrada no halo taho nakonu iha Dili,” nia hatutan.

Hafoin dezenvolvimentu infraestrutura, iha Dili laran mós taka hotu bee dalan.

“Ezemplu estrada Aitarak-laran to’o Ponte Comoro, bee dalan lubuk ida hosi ponte Comoro la funsiona maibé udan boot mai bee la liu iha fatin ne’e, tanba estrada taka. Ne’ebé drainajen sira tenke halo koresaun filafali atu bee ne’e labele mai hotu iha parte badak,” nia akresenta.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here