OÉ-CUSSE, 21 juñu 2021 (TATOLI)—Koordenadór Programa Cesta Bázika Rejiaun Administrativa Espesiál Oé-Cusse Ambeno (RAEOA), Maximiano Neno, informa atividade distribuisaun cesta bázika iha RAEOA 86,97% simu ona cesta bázika hosi totál benefisiáriu 74.493, no totál benefisiáriu iha RAEOA hamutuk 85.649
Notísia Eelevante: Cesta bázika hamenus komunidade nia sofrimentu
Maximiano Neno hateten, implementasaun cesta bázika ne’e inisiativa ida iha ámbitu planu rekuperasaun ekonómika ne’ebé fornese ai-han no produtu sira ba ijiéne pesoál nian ba populasaun sira, atu tulun família sira hodi hatán ba sira-nia nesesidade bázika kontribui ba halakon hamlaha no vulnerabilidade iha RAEOA.
“Implementasaun cesta bázika iha RAEOA la’o di’ak. Tarjetu distribuisaun hala’o iha sub-rejionál haat (4), suku 18 no aldeia 63 ho totál uma kain hamutuk 20.098 ho totál benefisiáriu 85.649. Hosi totál benefisiário sira-ne’e ita konsege distribui ona ba uma kain 17.862 ho totál benefisiáriu 74. 493. Ita halo ba persentajen ba uma kain ne’e atinje ona 88,87% no ba benefisiáriu ita konsege atinje ona 86.97%. Signifika, falta de’it 11%,” Maximiano Neno informa ba Ajênsia TATOLI, iha nia servisu fatin, Bairru Oébau, segunda ne’e.
Hosi 11% ne’bé seidauk simu cesta bázika ne’e, ekipa cesta bázika sei esforsu atu finaliza iha semana ne’e nia laran tanba sasán cesta bázika hosi kompañia sira to’o ona iha RAEOA mai ho Ró Success,
“Semana ida-ne’e ita bele konklui ona. Agora falta aldeia hitu (7) mak seidauk hetan ho suku Lifau tomak nia aldeia rua (2), aldeia lima (5) sira seluk mak hanesan suku Nipani aldeia ida (1), suku Naimeco aldeia tolu (3), suku Usitasa’e aldeia ida (1) ho nia totál benefisiáriu hamutuk 11,166 ho nia persentajen hamutuk 13%,” nia dehan.
Durante iha distribuisaun ne’e, ekipa cesta bázika enfrenta difikuldade hanesan ema balu naran laiha lista no naran iha lista maibé membru familia la-kompletu konsidera hanesan reklamante.
Ba asuntu ne’e, autoridade RAEOA iha ona mekanizmu propriu atu fó solusaun hodi hetan sira-nia direitu tuir dalan legal, tanba dadus populasaun autoridade simu direta hosi Ministériu Administrasaun Estatal.
Dadus kona-ba reklamante, ekipa cesta bázika propoin ona ba iha Prezidente Autoridade RAEOA no ekipa cezta bázika sei fó paresér atu haree hamutuk ho aprovizionamentu no gabinete apoiu jurídiku, nune’e bele fó solusaun.
Totál reklamante barak liu iha RAEOA ne’e maihosi suku Bobometo, postu administartivu Oésilo kuaze 300 no restante ne’e hosi suku balun ne’ebé ho númeru ki’ik.
Tuir diploma Ministérial konjuntu númeru 38/2020, 26 outubru, produtu ne’ebé tama lista projetu cesta bázika mak produtu alimentár kompostu hosi foos, batar, koto ka fore, amendoim, sorgum dulas, kafé, masin, fehuk roupa, susu-been, masin-midar, manu, manu tolun, mina tein, mina nuu, trigu, inklui modo sira hanesan ervilla, tomate, koto-nurak, fore sikote, repollu, kouve, modo metan, modo mutin, no modo seluk tán.
Enkuantu ba produtu ijiéne mak hanesan sabaun, alkohol jel, deterjente, eskova nehan no pasta nehan. Programa cesta bázika fixa membru ida-idak agregadu familiár sei hetan produtu ai-han ho valor $25 ba fulan rua.
Jornalista : Abilio Elo Nini
Editor : Cancio Ximenes
