Atleta na´in tolu ne´ebé hetan prestasaun di´ak iha eventu rua iha Filipina, maka hanesan Rubia (túr iha liman karuk), Ermelinda (klaran) no liman loos (Felisberto). Imajen Ajénsia TATOLI/Xisto Freitas

GLENO, 19 juñu 2021 (TATOLI)—Federasaun Atletizmu Timor–Leste (FATL) liu hosi Asosiasaun Atletizmu iha munisípiu Ermera, realiza eventu kurrida Maratona hodi halo promosaun ba atleta Felisberto de Deus, ne’ebé sei reprezenta Timor–Leste ba partisipa iha Olympic Games 2020 iha Tokyo-Japaun 23 jullu to’o 08 agusto 2021.

Eventu ne’e involve atleta maioria ho idade 6-12 no 13-19 iha kurrida maratona kilómetru tolu no lima ne’ebé hala’o iha kapitál Gleno.

Notísia relevante:Semana ne’e, FATL halo promosaun ba atleta Felisberto de Deus

Atleta hirak-ne’e, maioria estudante hosi eskola-sira iha Gleno, hanesan, Ensinu Tékniku Vokasionál Gleno, Ensinu Sekundáriu Jerál Nino Koni Santana, Kafé no seluk-tán.

Reprezentante Sekretáriu Estadu Joventude no Desportu (SEJD), Marcelino Maia, enkoraza atleta-sira atu badinas hodi hala’o treinamentu no kompromete katak, Governu sei hodi tulun nafatin kualkér modalidade ne’ebé iha vontade atu hamorin TL iha mundu.

“SEJD sei dezenvolve desportu ne’ebé hakbesik liu ba komunidade. Eventu ida-ne’e hanesan dalan ida atu promove desportu iha sosiedade no mos promove prestasaun mai hosi nível kraik,” Marcelino Maia hateten, iha Gleno, sábadu ne’e.

Nia konsidera eventu ne’e hatudu provas ida katak, atividade desportu kontinua la’o nafatin iha situasaun saida de’it, nune’e  husu kontinua pratika prevensaun COVID-19.

Nune’e mós Zaceu de Deus sente kontente tanba konsege kompete iha eventu ne’e ho ema barak no okupa primeiru lugar hosi kategogria kilómetru lima.

Nia agradese ba Federasaun Atletizmu Timor–Leste (FATL) liu hosi Asosiasaun Atletizmu iha munisípiu Ermera ne’ebé hola inisiativa ida ne’e, hodi promove liu tan atleta Ermeraoan ida ne’ebé sei partisipa iha Olympic Games 2020.

Partisipa iha eventu ne’e Komandante Polísia Nasionál Timor–Leste (PNTL) Munisipiu Ermera, reprezentante Sekerataria Estadu Joventude no Desportu (SEJD),  estrutura Komite Olimpiku Timor – Leste (CONTL-siga Portugés), reprejentante autoridade Munisipiu Ermera no estudante-sira.

Jornalista: Hortencio Sanchez

Editór: Cipriano Colo

HAKEREK NO HATÁN

Please enter your comment!
Please enter your name here