Prizioneiru-sira iha prizaun Becora sa’e karreta. Imajen/António Gonçalves.

DILI, 18 juñu 2021 (TATOLI)—Prizioneiru hamutuk na’in 539 iha estabelesimentu prizionál Becora, simu ona vasina AstraZenca doze dahuluk.

Diretór Prizaun Becora, João Domingos esplika, prizioneiru hirak-ne’e konsege simu vasina tanba serbisu hamutuk ho Sentru Saúde Munisípiu Dili bazeia ba orientasaun hosi Sentru Integradu Jestaun Krize (SIJK).

Notísia relevante:COVID-19, rekoperadu 97 no ativu 1.186

“Iha loron 13 maiu no 03 juñu,  dadur 374 mak simu uluk vasina.  Ohin na’in 165 kontinua simu tan vasina ba doze dahuluk,’’ João Domingos, hateten ba jornalista Agência Tatoli, sesta ne’e.

Tuir oráriu ne’ebé iha, dadur ne’ebé simu ona vasina doze dahuluk, sei kontinua simu fali doze daruak iha loron 02 fulan agostu.

Kona-bá guarda prizional, João Domingos, dehan maioria simu ona vasina iha sentru saúde-sira no família prizionál prontu koopera ho parte saúde atu bele simu vasina hodi proteje aan hosi COVID-19.

Prizioneiru iha prizaun Becora ne’ebé antes ne’e infetadu COVID-19, daudaun-ne’e rekoperadu hotu ona no hela na’in-ida mak sei pozitivu.

Regra prevensaun ne’ebé parte prizaun halo maka, suspende nafatin vizita família, atividade sosiál no relijiozu mai iha prizaun.

Tuir dadus, prizaun Becora iha prizioneiru 549, kompostu hosi prizaun kondenadu 421 no  prizaun preventiva 128.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here