Administradór Postu Lacluta, José de Andrade dos Santos. Imajen Tatoli/Vitorino Lopes da Costa

VIQUEQUE, 18 juñu 2021 (TATOLI)-Ekipa liña frente iha Postu Administrativu Lacluta, Munisípiu Viqueque, simu ona vasina kompletu (doze dahuluk no daruak).

Administradór Postu Lacluta, José de Andrade dos Santos, sesta ne’e, iha Viqueque, informa ekipa liña frente-sira, kompostu hosi pesoál saúde, autoridade postu, xefe suku, xefe aldeia, funsionáriu públiku no ajente administrasaun públiku-sira simu kompletu ona vasina AstraZeneca, sesta ne’e.

José de Andrade dos Santos hatutan, mosu Covid-19 iha postu Lacluta servisu konjunta ho ajente Polísia Nasionál Timor-Leste (PNTL), ajente pesoál saúde no autoridade lokál sira fó motivasaun ba komunidade  hodi halo prevensaun ba pandemia COVID-19.

Nia haktuir, vasina dahuluk ne’e komunidade  Lacluta sente trauma tanba  rona  rumoris sira ne’ebé  mosu iha media sosiál simu vasina  dehan iha tinan badak nian laran ema sei  mate, maibé agora sira komprende ona kona-bá vasina ne’e hasa’e imunidade ne’ebé komunidade partisipa ona.

Postu administrativu Lacluta hamutuk suku haat (4); Suku Ahic, Dilor, Laline no Uma Tolu.  Kada suku kompostu hosi aldeia lima (5) totál aldeia hamutuk 20 no totál abitante hamutuk na’in-9.873.

Jornalista : Vitorino Lopes da Costa

Editór      : Francisco Simões

HAKEREK NO HATÁN

Please enter your comment!
Please enter your name here