Xefe Sentru Saúde Postu Administrativu Iliomar, Munisípiu Lautém, Narcísio Camões, atende vasina AstraZeneca ba komunidade. Imajen/Espesiál

DILI, 18 juñu 2021 (TATOLI)-Xefe Sentru Saúde Postu Administrativu Iliomar, Munisípiu Laútem, Narcísio Camões hateten, abitante iha Ilimor hamutuk 390 simu ona vasina AstraZeneca.

“Kona-bá vasina AstraZeneca, komunidade Iliomar hahú lansa ba ekipa liña frente, au-mézmu tempu, lansa mós ba komunidade jerál etapa dahuluk nian iha kuarta (16/06) to’o ohin. Sira ne’ebé simu ona vasina AstraZeneca hamutuk 390 no hosi númeru ne’e, ema na’i- 56 liña frente,” Narcísio Camões, informa ba Agência Tatoli liuhosi telefónika, sesta ne’e.

Nia hatutan, komunidade jerál ne’ebé simu ona vasina AstraZeneca ba etapa dahuluk ne’e kategoria ba idózus no ema ne’ebé hetan moras króniku sira hanesan, rins, azma no tensaun.

“Vasina AstraZeneca ne’ebé haruka mai ami-nia Postu Administrativu Iliomar ne’e hamutuk doze 400 no agora ami uza hela de’it ona doze 100-resin,” nia hateten.

Nia afirma, liuhosi sosializasaun vasina AstraZeneca nian ne’ebé sira hala’o ba komunidade Postu Administrativu Iliomar ne’ebé daudaun prontu atu simu vasina ba etapa dahuluk nian hamutuk 698. Maibé, hosi númeru ne’e bele aumenta tan tanba daudaun ne’e ekipa task force Iliomar kontinua halo advokasia ba komunidade tama-sai suku-sira iha Iliomar.

Jornalista       : Arminda Fonseca 

Editór             : Francisco Simões

HAKEREK NO HATÁN

Please enter your comment!
Please enter your name here