Biblioteka ba labarik iha fundasaun Sentru Quasadhip Ruak. Imajen Tatoli/Nelia Fernandes.

DILI18 juñu 2021 (TATOLI)—Koordenadór Sentru Komunitáriu no Sentru Quesadhip Ruak (CQR), Mardoqueu Soares, hateten Governu Austrália liuhosi Embaixadór Austrália iha Timor-Leste, Peter Roberts, ho nia espoza Lisa Robert hola inisiativa hakarak apoia biblioteka ba fundasaun Sentru Quesadhip Ruak atu labarik sira bele asesu.

Notísia Relevante: Família Embaixadór Austrália oferese prezente Natál ba labarik-sira iha fundasaun CQR

Koordenadór Sentru Komunitáriu no Sentru Quesadhip Ruak (CQR), Mardoqueu Soares. Imajen Tatoli/Nelia Fernandes.

“Sira na’in-rua foti inisiativa rasik mai haree tiha uluk fatin no kondisaun ba labarik sira, to’o ikus sira hakarak apoia. Tanbá ne’e sira iha inisiativa apoiu biblioteka ba labarik sira iha 2019 ne’e, no sira prepara mós armari atu haloot livru sira-ne’e iha laran, nune’e labarik sira bele asesu,” Mardoqueu Soares hateten ba Agênsia Tatoli, iha nia kna’ar fatin, Taibesi, sesta ne’e.

Biblioteka ne’e atu fasilita labarik sira bele estuda no bainhira Embaixadór nia espoza Lisa Roberts iha tempu livre, sempre hola parte mós hodi fó hanorin lian Ingés ba labarik sira sentru ida-ne’e.

“Livru sira ne’e, mai hosi Austrália ho lian Inglés no balun sira konsege halo tradusaun ba Tetun. Livru sira-ne’e mak hanesan balun iha lian Tetun no Inglés, matematika, pintura, no livru balun kona-ba oinsá labarik sira koñese animál sira-nia naran,” nia dehan.

Labarik sira-ne’ebé tuir formasaun iha Sentru Quesadhip Ruak (CQR) ne’e, balun konsege ramata ona hodi kontinua sira-nia estudu iha Pré-sekundáriu. Labarik sira-ne’ebé tuir formasaun iha sentru ida-ne’e, hahú hosi 2019 to’o 2021 ne’e kuaze 100-resin.

“Kada tinan ita rejistu dala tolu. Tanba labarik sira aprende kada fulan tolu tenke pasa. Sé mak hakarak kontinua bele kontinua no sé mak hakarak bele para ne’e bele para. Maibé labarik barak mak iha vontade hakarak aprende. Iha sentru ne’e, iha klase dadeer no lorokraik, entaun labarik kuaze 100-resin mak asessu ba biblioteka ne’e,” nia hateten.

Totalmente, labarik sira kuaze 200-resin mak tuir formasaun iha Sentru Quesadhip Ruak (CQR) hodi tuir fotmasaun ba lian Inglés, Portugés, Matematika no Relijiaun ka Morál.

Jornalista: Nelia Fernandes

Editór: Cancio Ximenes      

HAKEREK NO HATÁN

Please enter your comment!
Please enter your name here