Unicef apoia máskara 21.777 ba edukasaun Viqueque
VIQUEQUE, 17 juñu 2021 (TATOLI)- Unicef iha Timor-Leste, sesta liubá (11/06), apoiu máskara hamutuk 21.777 ba Edukasaun Munisípiu Viqueque atu bele distribui ba estudante-sira iha Viqueque bainhira reativa fali ensinu aprendizajen prezensiál.
Notísia Relevante : Profesór 900 iha Viqueque prontu vasina doze dahuluk
“Edukasaun Munisípiu Viqueque prepara ona fasilidade prevensaun COVID-19 ne’ebé hetan apoiu máskara hamutuk 21.777 hosi Unicef. Ami hein de’it bainhira Konsellu Konsultivu Munisípiu Viqueque deside reativa eskola bele fahe ba estudante-sira,” diretór Edukasaun Munisípiu Viqueque, Emidio Amaral, informa ba Agênsia Tatoli iha Viqueque, kinta ne’e.
Emidio Amaral afirma maske reativa eskola, maibé kontínua kumpre protokolu saúde públiku, liuliu prepara bee-moos ho sabaun iha kada eskola atu fasilita estudante-sira fase-liman beibeik ho sabaun, uza máskara no garante distánsia fíziku.
Jornalista : Vitorino Lopes da Costa
Editór : Francisco Simões
