VIQUEQUE, 17 juñu 2021 (TATOLI)- Mistériu Obras Públika (MOP) no R4D iha Munisípiu Viqueque, kinta ne’e, fó formasaun ba emprezáriu konstrusaun sivíl Munisípiu Viqueque kona-bá oinsá hola parte iha konkursu projetu estrada rurál.
“Formasaun ne’e hala’o tanba dala-barak emprezáriu konstrusaun sivíl-sira partisipa iha konkursu públiku la prienxe rekizitu administrativa,” diretór MOP Munisípiu Viqueque, Mario do Rego, hateten hafoin abertura formasaun ne’ebé hala’o iha salaun administrativu Munisípiu Viqueque.
MOP ho R4D kria polítika no formatu hodi oferese ba empreza-sira no esplika formatu hodi bele komprende, nune’e sira konkorre ba pakote projetu estrada rurál sia (9) iha Munisípiu Viqueque tenke ho rigór hahú hosi prosesu prienxe administrasaun to’o sosa dokumentu konkursu nian.
Iha Pakote projetu sia (9) ne’e, pakote hitu (7) konkursu iha MOP Viqueque no pakote rejionál sei kompete hosi munisípiu tolu hanesan Lautém, Baucau no Viqueque ne’ebé nia prosesu dokumentu hala’o iha munisípiu Baucau no enkamiña ba Komisaun Nasionál Aprizionamentu (CAN, sigla portugés).
Jornalista : Vitorino Lopes da Costa
Editór : Francisco Simões