Vise-Ministru Interiór, António Armindo. Imajen TATOLI/Egas Cristóvão

DILI, 17 juñu 2021 (TATOLI)–Governu Austrália sei apoia orsamentu ho valór millaun $1,5 ba Ministériu Interiór (MI) hodi estabelese sistema integradu ida hodi hadi’a servisu migrasaun hanaran ‘MIGAS’

Tanba ne’e, Vise-Ministru Interiór, António Armindo, halo aprezentasaun ba Primeiru-Ministru (PM) no Ministru Interiór, Taur Matan Ruak, kona-ba sistema ne’e.

“Tuir orientasaun Ministru Interiór, durante mandatu hakarak hadi’a sistema servisu migrasaun. Durante ne’e Governu kolabora hamutuk ho International Organization for Migration (IOM) atu haree sistema intregradu ne’ebé di’ak liu no serve ba servisu migrasaun iha Timor-Leste, atu nune’e bele hadi’a servisu migrasaun. Tanba ne’e, maka iha ona kontaktu ho doadór ne’ebé atu ajuda ita,” Vise-Ministru Interiór relata hafoin hasoru PM, iha Palásiu Governu, kinta ne’e.

Sistema MIGAS ne’e hosi IOM, ne’ebé estabelese ona iha nasaun 25 no agora daudaun MI serbisu hamutuk ho sira atu estabalese mós iha Timor-Leste.

Governante ne’e konsidera, servisu migrasaun presiza sistema integradu no daudaun ne’e serbisu hotu tenke dijitaliza, tanba ne’e ho implementasaun sistema ne’e bele ajuda servisu migrasaun ho lalais.

Hafoin aprezenta tiha ba Ministru Interiór no hetan apresiasaun, sei aprezenta mós ba Konsellu Ministru hodi hetan deliberasaun.

Tuir planu entre agostu-setembru 2021 sei hahú implementa sistema integradu faze dahuluk, ne’ebé sei han tempu durante tinan-ida resin.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here