Diretór Institutu Nasionál Linguistíka (INL), Benjamin de Araújo Cortereal. Imajen/Espesiál.

DILI, 17 juñu 2021 (TATOLI)—Diretór Institutu Nasionál Linguistíka (INL), Benjamin de Araújo Cortereal, hateten iha tinan 2020-2021 ne’e INL labele realiza atividade formasaun ba profesór no funsionáriu sira iha munisípiu tanbá pandemia COVID-19.

“Agora ne’e ami labele halo formasaun ba grupu alvu sira iha munisípiu tanbá pandemia COVID-19. Hahú hosi tinan 2020 to’o agora ne’e, ami labele halo formasaun. Prevee hela orsamentu maibé labele implementa,” Benjamin de Araújo Cortereal hateten ba Agência Tatoli, iha nia kna’ar fatin Kampus Sentrál Universidade Nasional Timor Lorosa’e (UNTL), Liceu, Dili, kinta ne’e.

Kada tinan ne’e profesór no peskizador sira hosi INL dezloka ba munisípiu fó formasaun ba grupu organizadu sira iha munisípiu sira hanesan profesór, funsionáriu hosi administrasaun munisípal, postu administrativu, jornalista no ONG sira, maibé iha surtu COVID-19 ne’e INL labele ba.

Tanba, nia dehan, profesór no peskizadór hosi INL mós dalaruma sira hanorin iha eskola, entauun INL tenke uza tempu ne’ebé sira bele dezloka ba munisípiu karik, profesór sira ne’e bele fila-fali mai atu rekupera fali sira-nia aula.

Bainhira INL fó formasaun ba grupu alvu sira ne’e ramata ona, INL baibain fahe livru ba partisipante sira-ne’ebé tuir kursu ne’e maibé la’ós lori ba atu faan.

“Livru ne’ebé INL prodús ne’e lori ba fahe ba ema sira-ne’ebé partisipa kursu durante semana ida tanba ema ne’e iha direitu atu hetan livru tolu. Durante tuir formasaun iha loron lima nia laran, partisipante ne’e la domina maibé nia loke ne’on katak iha regra ba lian ne’e hanesan entaun nia aprende uitoan. Livru ne’e ita rai hela ba sira, nune’e nia bele konsulta ho livru ne’e,” nia dehan.

Iha eskritóriu sentrál hanesan administradór postu, munisípiu, servisu edukasan nian ne’e, INL ba koloka disionáriu boot ida tau iha sira-nia fatin ida-idak, nune’e funsionáriu sira bele halo konsultasaun ba disionáriu refere bainhira presiza.

Etretantu funsionáriu sira ne’ebé tuir formasaun ne’e iha direitu atu hetan livru tolu mak hanesan Gramatica do Tétum Oficial, Normas da Ortografia Padronizada no Prontuário Ortográfico de Tétum tanba husi livru ne’e bele ajuda uituan profesór no funsionáriu sira bele konsulta.

Diretór ne’e infroma, orsamentu ba dezlokasaun no atividade formasaun iha kada Munisípiu ne’e hamutuk $3.500 no $400, tanba formasaun iha munisípiu halo durante loron lima no iha tinan ida-nia laran ne’e, INL bele dezloka ba munisípiu dala tolu ka haat.

INL estabele iha Unuversidade Nacionl Timor Lorosa’e (UNTL) iha fulan-jullu nia klaran iha tinan 2001, bazea ba dekretu Governu númeru 1/2014, 14 Abríl, ne’ebé ko’alia kona-ba ortográfia padronizada INL nian katak língua tetun importante tebes iha prosesu konstrusaun Estadu no nasaun nian. Tanba ne’e, instituisaun Estadu hotu-hotu inklui meu komunisaun sosiál sira tenke uza padraun tetun INL ne’ebé sai hanesan lian ofisiál iha Timor-Leste.

Notísia Relevante: Igreja Katólika Konsidera Tetun INL Seidauk Refleta Realidade Timor

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here