Diretór Ezekutivu SERVE, Florêncio Sanches. Imajen TATOLI/Jogerjo Guterres

DILI, 16 juñu 2021 (TATOLI)—Governu deside halo estensaun mandatu Florêncio da Costa Sanches, ba kargu Diretór Ezekutivu Servisu Rejistu no Verifikasaun Emprezariál, Institutu Públiku (SERVE, I.P).

Diploma ne’e aprezenta hosi Ministru Koordenadór Asuntu Ekonómiku, Joaquim Amaral.

“Konsellu Ministru aprova ona projetu Rezolusaun Governu, kona-ba rekondusaun Florêncio da Costa Sanches, ba kargu Diretór Ezekutivu SERVE,I.P, ba mandatu tinan-tolu iha rejime eskluzividade,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha salaun auditóriu Ministériu Finansa, kuarta ne’e.

Ho konfiansa ne’e, Florêncio Sanches sente orgullu no komprometidu atu serbisu maka’as hodi diversifika ekonomia.

“Dala ida tan apresia no orgullu tebes ba desizaun Governu, atu lidera nafatin institutu públiku ida-ne’e atende komunidade emprezariál. Tanba iha konfiansa ida-ne’e, entaun ha’u iha planu atu servisu di’ak liután atubele asegura polítika VIII Governu ne’ebé atu promove boa governasaun no diversifika ekonomia atubele hasa’e reseita,” Diretór Ezekutivu SERVE,I.P hateten via telefónika.

Nia dehan, servisu rejistrasaun nia papel tinan-tolu mai oin, ho rejistadu empreza ne’ebé atinje ona 30.000, bele sa’e to’o 60.000

Florêncio Sanches asume knaar atuál dezde iha fevereiru 2013, ho estensaun ne’e ba dala-tolu ona.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here