Produtu Cesta Bázika iha bote-laran Imajen TATOLI/Antónia Gusmão

BOBONARO, 16 juñu 2021 (TATOLI)—Família hamutuk 150 iha suku Holsa, postu administrativu Maliana, munisípiu Bobonaro seidauk simu Cesta Bazika.

Xefe suku Holsa, António Santa Cruz, hateten maski autoridade lokál aprezenta ona reklamasaun ba Governu, no kompañia fornesedór-sira, maibe seidauk iha resposta.

Notísia relevante:Bobonaro rejista tan benefisiáriu 300 ba subsídiu idozu

“Iha ha’u-nia suku, iha reklamasaun 150 ne’ebé seidauk simu. Situasaun ne’e halo ami hanesan líder komunitária preokupa tebes,” António Santa Cruz, hateten ba jornalista  Agência Tatoli, iha sede suku Holsa, kuarta ne’e.

António Santa Cruz esplika, lista distribuisaun Cesta Bázika bazeia ba dadus subsídiu  agregadu familiár $200, no populasaun hosi suku ne’e ne’ebé forma família foun no sira-ne’ebé sai reklamante ba subsídiu $200 mós to’o oras-ne’e seidauk hetan tanba naran la tama iha sistema.

“Sira ne’e iha direitu atu hetan Cesta Bázika, tanba ne’e ami husu ba Governu atu bele halo planu ne’ebé di’ak hodi rezolve asuntu ne’e,” nia husu.

Autoridade lokál ne’e husu tanba ho programa Cesta Bázika bele tulun komunidade ne’ebé presija ajuda iha tempu Estadu emerjénsia.

Suku Holsa iha aldeia neen ho totál abitante hamutuk na’in 7.967 mai hosi  xefe família 1.802, ne’ebé hosi númeru ne’e família 150 mak seidauk asesu ba programa Cesta Bázika.

Aldeia neen iha suku Holsa mak hanesan aldeia Solugolo iha populasaun 2.558 feto 1.287 no mane 1.271 ho nia Xefe família 593.

Aldeia Bilicou iha populasaun 1.671 feto 851 no mane 820 totál xefe família 372, aldeia Oplegul ho totál populasaun 1.509 feto 766 no mane 743 ho total xefe família 335.

Aldeia Lolo’oa ho totál populasaun 1.105 feto 555 mane 550 ho totál xefe família 239, aldeia Secar ho totál populasaun 692 feto 349 no mane 343 totál xefe família 163 no aldeia Taz ho totál populasaun 432 feto 230 no mane 202 ho totál xefe família 100.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here