Prokuradór Jerál Repúblika, Alfonso Lopez. Imajen Tatoli/Egas Cristovão

DILI, 15 juñu (TATOLI)—Prokuradór Jerál Repúblika (PJR), Alfonso Lopez, hateten iha nível nasionál kazu anteriór ne’ebé ho nia prosesu sei pendente ne’e hamutuk 2.577 tanba serka sanitária no konfinamentu obrigatóriu.

“Iha serka sanitária no konfinamentu obrigatóriu, ita haree katak iha nivél nasionál prosesu kazu pendente mais anteriór ne’e iha 2.577. Iha prosesu entrada, nivél nasionál ne’e hamutuk kazu 398, depois ita konsege finaliza kazu 253 mai aumenta númeru pendente maibé konsege mantein estabilidade,” Alfonso Lopez hateten ba jornalista sira, hafoin hala’o enkontru ho Prezidente Repúblika, Francisco Guterres Lú Olo, iha Palásiu Prezidénsia Nicolau Lobato Bairru Pite, Dili, tersa ne’e.

Nia hateten, iha serka sanitária no konfinamentu obrigaróriu ne’e notifikasaun barak mak interven prosesuál ba arguidu, tertamuña, vítima barak mak la komparese (la mosu), entaun ho ida-ne’e mak prodús la másimu.

Maske nune’e, liuhosi konsellu superiór majistradu públiku estabelese atividade rotativa hodi fó maiór atensaun liu-liu ba kazu grave sira, julgamentu pendente, no arguidu prezu tanba ida-ne’e mak sempre iha maiór atensaun.

“Kazu grave sira agora rejistradu ne’e, agora iha investigasaun. Ita akompañia hela kazu hanesan membru PNTL ne’ebé tiru sidadaun na’in-rua mate no ida hetan ofensa grave. Kazu ida-ne’e, iha sábadu (12/06) dadeer ne’e PJR reforsa no hatún despaixu. Ita akompañia foin dadauk primeira interrogatóriu realiza tiha ona, agora aplika medida prizaun preventive. Investigasaun sei la’o hela, uza peritu sientífika, nune’e iha verdade materiál,” nia dehan.

Prokuradór Jerál Repúblika (PJR) iha prioridade ba kazu pendente sira maibé tenke iha tratementu igualdade, katak fó tratamentu uluk bazea ba kazu ne’ebé tama uluk hafoin ba kazu foun sira-ne’ebé tama ikus.

Iha serka sanitária ne’e, nia informa, hosi kazu pendente hirak ne’e iha kazu ne’ebé boot no barak liu ne’e mak violénsia domestika, tanba ema barak hela de’it iha uma.

“Agora, liuliu serka sanitária no konfinamentu obrigatóriu ne’e, liu-liu iha uma laran ne’e, kazu violénsia domestika mak barak liu,” nia dehan.  

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here