Estudante-sira simu rezumu matéria iha eskola. Imajen Tatoli/Egas Cristóvão

DILI, 15 juñu 2021 (TATOLI) – Ministru Edukasaun Juventude no Desportu (MEJD), Armindo Maia, rekoñese estudante-sira sofre ona konsekuénsia boot  tanba lakon matéria barak iha prosesu ensinu aprendizajen prejensiál. Ne’e-duni, tenke iha programa rekuperasaun filafali bá estudante-sira.

“Ita hanoin ona atu re-ativa programa rekuperasaun aula prejensiál ho medida seman sim semana não, maibé desizaun ne’e la’ós MEJD mesak mak sei foti, presiza Ministériu Saúde inklui Sentru Integradu Jestaun Krize (SIJK) nia kontribuisaun,” Ministru Armindo Maia, haktuir  ba jornalista-sira iha Parlamentu Nasionál, tersa ne’e.

Ministru Edukasaun ne’e esplika katak durante Governu deside estadu emerjénsia ho serka sanitária no konfinamentu obrigatóriu ne’e, Ministériu Edukasaun hanoin ona hodi kria mós programa online ka eskola ba uma atu alunu sira labele lakon matéria.

Ministru Armindo Maia, hateten programa eskola ba uma ka eskola online  mós la garante atu rezolve problema edukasaun nian. Tan ne’e, MEJD hamosu tan distribuisaun rezumu matéria ba alunu-sira.

Nia akresenta katak konsekuénsia ida bainhira Governu re-ativa eskola iha Dili, konserteza alunu rihun ida resin mak sei tun ba dalan. populasaun metade tenke sai ona hosi uma hodi hala’o atividade iha públiku nia leet, transporte públiku sei lalin estudante ba mai. Tan ne’e mak MEJD sei haree didi’ak.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here