Polísia Unidade Tránzitu prende karreta Toyota Rava ho númeru matrikula A13442 iha area Hudi-Laran tanba kontra sinais transit, kinta 07 janeiru 2021. Imajen Tatoli/António Gonçalves

DILI, 15 juñu 2021 (TATOLI)—Durante fulan maiu, Polísia Nasionál Timor Leste (PNTL) munisípiu Dili, konsege rekolla $11.928, hodi hatama ba konfre Estadu.

Osan hirak-ne’e PNTL Dili rekolla liu hosi atividade operasaun no pasa revista ba movimentu transporte públiku ne’ebé kontra regra tránzitu hodi pasa billete ba infratór 328 no apreensaun ba sasán evidénsia motorizada hamutuk 287.

Notísia relevante:PNTL halo apreensaun ba motór 60 no karreta haat

Komandante Polísia munisípiu Dili, Superintendente Xefe, Henrique da Costa, esplika infratór hirak-ne’e konsidera viola regra Estadu Emerjensia (EE), Serka Sanitária (SS) no Konfinamentu Domisiliáriu (KD) jerál ne’ebé implementa iha munisipiu Dili.

“Osan ne’ebé polisia konsege rekolla iha fulan maiu hamutuk $11.928,” Superintendente Xefe, Henrique da Costa hateten ba jornalista-sira  iha Komandu PNTL Caicoli, tersa ne’e.

Superintendente Xefe, Henrique da Costa konsidera osan ne’ebé rekolladu iha fulan maiu ki’ik tebes, kompara ho fulan janeiru iha $25.351 liu hosi infrasaun billete ba infratór hamutuk 661 no apreensaun ba sasán evidénsia 1.174.

Iha fulan fevereiru, PNTL Dili rekolla $25.458 no apreensaun ba sasán evidénsia 679 no pasa billete ba infratór 481 no fulan marsu rekolla $20.098, apreensaun ba sasán evidénsia 588 no pasa billete ba infratór 638.

Nune’e mós iha fulan abríl rekolla $6.929, apreensaun ba sasán evidénsia 158 no pasa billete 174. Ba fulan juñu daudaun ne’e PNTL Seksaun Tránzitu Dili foin rekolla $6.711, sasán evidénsia 150 no pasa billete ba infratór na’in-181.

Komandu PNTL Dili alerta ba públiku bainhira kondús karreta ka motór tenki lori nafatin dokumentu kompletu, tanba PNTL kontinua implementa lei kódigu kontrola movimentu transporte.

Jornalista: Eugénio Pereira

Editór: Cipriano Colo