Atoni-oan sira submete ba teste swab molok dezloka ba Oé-Cusse. Imajen/Espesiál

DILI, 14 juñu 2021 (TATOLI)-Atoni-oan sira iha kapitál Dili, segunda ne’e, halo protesta hasoru reprezentante Prezidente Autoridade Rejiaun Administrativa Espesiál Oé-Cusse Ambeno (PA-RAEOA) atu labele halo diskriminativu bainhira fasilita transporta Atoni-oan sira ne’ebé hakarak sai hosi Dili ba Oé-Cusse.

Notísia Relevante : ZEESM distribui foos ba Atoni-oan iha Dili

Sente diskriminativu iha prosesu sira-ne’e, Atoni-oan sira lansa asaun protestu hasoru PA-RAEOA iha Edifísiu Zona Espesiál Ekonomia Sosiál Merkadu (ZEESM) iha Farol, Dili.

Portavós Atoni-oan, Zecafriado Afulit Coa hateten, sira halo protesta hasoru PA-RAEOA tanba prosesu teste swab faze daruak ba Atoni-oan sira iha kapitál Dili,  ekipa reprezentante Prezidente Autoridade RAEOA halo diskrimina hasoru sira. Tanba la tuir konkordánsia ne’ebé iha fulan kotuk entre Atoni-oan ho ZEESM no pilár III hosi Sentru Integradu Jestaun Krize (SIJK) halo.

“Naran sira ne’ebé ami identifika no alista iha fulan kotuk fó ba ZEESM no ekipa saúde Pilár III hosi SIJK, ema hamutuk 187 atu halo teste swab, maibé ohin, to’o bolu naran lista ne’ebé ami hatama la bolu, bolu fali lista ne’ebé Gabinete ZEESM halo rasik, entaun ida ne’e diskriminasaun ida tanba durante ne’e komunidade lubuk ida mak mai toba no ezije atu fila, maibé ikus mai naran la bolu, bolu fali sira ne’ebé foin mai ne’e, entaun ami sente ida ne’e laloos no  husu labele diskrimina ami,” Zefafriado Afulit Coa informa ba Agência Tatoli iha Gabinete ZEESM, Farol, Dili.

Koordenadora Ekipa Forsa Servisu ba Gabinete ZEESM, Dili, Fátima, Olga Amaral. Imajen Tatoli/Arminda Fonseca

Hatán preokupasaun ne’e, koordenadora Ekipa Forsa Servisu ba Gabinete ZEESM, Dili, Fátima, Olga Amaral, esklarese Gabinete ZEEMS la halo diskriminasaun ba Atoni-oan sira, tanba lista mai duni hosi portavós Atoni-oan, maibé komunidade balu mós balu mai rasik alista iha edifísiu  ZEESM.

“Ne’ebé lista hotu-hotu laiha diskriminasaun tanba sira hotu-hotu Atoni-oan, ne’ebé naran ne’ebé ohin bolu ne’e kahur-malu. Lista hosi estudante-sira inklui maluk balu ne’ebé mai rasik tau naran iha edifisiu ZEESM, tanba ne’e ohin ita bolu naran ne’e haree ba sira ne’ebé oan nurak, no idade ne’ebé liu, hotu mak bolu fali joven-sira tanba ne’e PA-RAEOA la halo diskriminasaun ba Atoni-oan sira,” Fátima Olga Amaral hateten.

Nia afirma, sira ne’ebé ohin, naran la bolu ba etapa datoluk nian sira sei bolu tanba haree ba kapasidade kuarentena nian entaun presiza ema na’in-80.

“Ema ne’ebé ohin tuir ona teste swab lista hamutuk 130, maibé balu la marka prezensa entaun ohin ne’e ema hamutuk 81 mak submete ona ba swab razaun balu pozitivu karik bele taka,” nia subliña.

Koordenadór ZEESM, Nilton Pereira, hateten ba sira ne’ebé ohin, hasai ona teste swab rezultadu sei fó sai iha kuarta (16/06). Tanba ne’e tuir pedidu ba SIJK atu transporta komunidade  ba Ambeno ne’e iha loron kuarta, ne’ebé bainhira rezultadu fó sai ona prepara sira sei halo viajen ba Ambeno, no posibilidade ró ne’ebé sei transporta sira ró SUCCESS.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here