Ekipa liña frente iha Munisípiu Viqueque, hahú simu vasina AstraZeneca doze daruak, segunda (14/06/2021). Imajen Tatoli/Vitorino Lopes da Costa

VIQUEQUE, 14 juñu 2021 (TATOLI) -Ekipa liña frente iha Munisípiu Viqueque, segunda ne’e, hahú simu vasina AstraZeneca doze daruak.

Notísia Relevante : Vasina doze dahuluk iha Viqueque hamutuk 1.093

“Ohin, ami simu vasina doze daruak tanba doze dahuluk nian ami simu tiha ona iha abríl liubá. Domingu horiseik (13/06), hahú ho pesoál saúde no ohin sira tuun ba terrenu ka ba postu saúde sira hodi kontinua fó vasina doze daruak nian ba liña frente-sira,” Celestina da Costa Alves, xefe sentru saúde Viqueque Vila informa ba Agência Tatoli iha Viqueque, segunda ne’e.

Celestina hatutan, ekipa vasina AstraZeneca, ohin, koloka hotu ona ba postu administrativu sira iha Munisípiu Viqueque hodi fó vasina AstraZeneca ba  administradór postu, xefe suku no xefe aldeia sira no hirak ne’ebé konsidera liña frente no sidadaun sira ne’ebé voluntáriamente hakarak vasina.

“Fó vasina ba Polísia Nasionál Timor-Leste (PNTL) Munisípiu Viqueque no mós ba membru eskuadra PNTL sira postu administrativu sira no adisionál sira ne’ebé uluk simu ona vasina doze daruak,” Celestina realsa.

Xefe sentru saúde Viqueque Vila, Celestina  da Costa Alves, husu liña frente sira ne’ebé simu ona vasina doze dahuluk hotu bele asesu ba iha postu imunizasaun sira hodi hetan vasina.

Tuir dadus vazina doze dahuluk liña frente no adisionál sira ne’ebé simu ona vasina iha Munisípiu Viqueque, hosi postu Viqueque Vila na’in-523, postu administrativu Uatulari na’in -94, postu Ossu na’in-170,  postu Uatucarbau na’in-109 no postu administrativu Lacluta na’in-96 totál abitante na’in-1.093.

Jornalista       : Vitorino Lopes da Costa
Editór             : Francisco Simões

HAKEREK NO HATÁN

Please enter your comment!
Please enter your name here