Abitante-sira forma iha Sentru Saúde iha Dili-laran hodi simu vasina AstraZeneca, sesta (21/05/2021). Imajen Tatoli/António Gonçalves.

DILI, 13 juñu 2021 (TATOLI)—Koordenadór Forsa-Tarefa ba Prevensaun no Mitigadaun Surtu COVID-19 iha Timor-Leste,  Rui Maria de Araújo, relata  dadus   jerál ba Timor-Leste tomak, domingu (13/06/2021), katak kazu rekuperadu hamutuk 101.

Notísia Relevante : COVID-19: pozitivu 31, rekoperadu 164 no ativu 1.616

Komunikadu imprensa hosi Sala Situasaun Sentru Integradu Jestaun Krize (SIJK) ne’ebé Agência Tatoli asesu, relata mós kazu detetadu foun hamutuk  57; kompostu hosi iha Dili (25) no iha Munisípiu seluk (32).

“Husi totál kazu detetadu foun, ohin, mane 33 no feto 24, hirak ho idade tinan 60 no hosi totál kazu detetadu foun ne’e, proporsaun kazu sintomátiku hamutuk 7,0%,” informa Rui Maria de Araújo liuhosi komunikadu imprensa ne’e.

SIJK mós informa dadus  totál kazu ativu, ohin, 1536, totál kazu konfirmadu kumulativu iha sura hosi 21 marsu 2020, hamutuk 8.285, Hosi horiseik mai ohin, hamutuk hotu Laboratóriu Nasionál Saúde halo 699 testes PCR iha Dili, ho detalles hanesan tuir mai:

 a).  Vijilánsia sentinela:40.

b).  Rastreiu ba kontaktu (Contact tracing):40.

 c).  Rastreiu Aleatóriu (Random Screening):151.

d). Viajen sai hosi serka sanitária Munisípiu Dili: 427.

e). Viajen internasionál:5.

f). Follow up iha kuarentena:36.

Total testes PCR ne’ebé halo iha loron 12 juñu, iha Munisípiu sira seluk, REAOA & HNGV, hamutuk 315, ho detalle hanesan tuir mai:

a). Baucau:82;

b). Ermera:0;

c). Maliana:21;

d). Maubisse:70;

e). RAEOA:17;

f). Suai:33;

g). Viqueque:2;

h). HNGV: 91.

Komunikadu imprensa SIJK nian ne’e informa mós evolusaun surtu COVID-19 iha Dili ho munisípiu seluk no RAEOA, atu bele hatene surtu ida ninia evolusaun, no mós surtu ne’e aumenta ka diminui, indikadór ida ne’ebé matenek-na’in epidemiolojia nian uza, maka insidénsia. Konvensionalmente insidénsia sukat totál kazu foun, kada loron, pur 100.000 abitante, no hatudu risku ne’ebé populasaun iha atu hetan da’et moras ida.

Informasaun hosi Vera Cruz

Iha loron 13  juñu 2021, izolamentu Vera Cruz halo tratamentu ba kazu detetadu na’in-24. Iha área obstetrisia na’in-lima (5), iha medisina interna na’in-19;

 a).  Sira na’in-tolu (3) iha obstetrisia, kategoria leve (mild) hotu.

b). Hosi sira na’in -9 iha medisina interna, na’in-rua (2) grave (uza oksijéniu ho NRM – Nonrebreather mask), na’in-sia (9) moderadu, na’in-ualu (8) leve (mild).

Informasaun adisionál

Rui Araújo lori SIJK nia naran informa públiku tomak katak hahú  loron 02 juñu  2021, ema ne’ebé rekuperadu ona hosi moras COVID-19  no liu ona hosi izolamentu terapéutiku domisiliáriu (iha uma-rasik) ka iha fatin ne’ebé Estadu prepara, bainhira atu dezloka sai hosi/tama ba serka sanitária, la presiza halo swab, maibé nafatin presiza hetan autorizasaun exepsionál hosi Diretór SIJK.

Atu bele prosesa autorizasaun exepsionál tenke hatuku Sertifikadu Alta hosi Izolamentu, ne’ebé Ministériu Saúde, liuhosi ninia Pilar 7, fó ba ema rekuperadu.

“Aproveita hato’o mós ba jornalista no populasaun katak ema ne’ebé detetatu pozitivu, bainhira rekuperadu ona, bele simu vasina, doze dahuluk, ka doze daruak. La iha kontra-indikasaun médika,” Rui Araújo mensiona liuhosi komunikadu imprensa ne’e.

Nota komunikadu SIJK nian ne’e esklarese mós katak loos duni, iha Sertifikadu Alta hosi Izolamentu, hakerek informasaun hanesan tuir mai ne’e ‘’Ema ne’ebé rekuperadu, di’ak-liu hein to’o másimu fulan 6 (neen), sura huoi loron alta, maka foin simu vasina;’’ Informasaun ida ne’e, fó sai ho baze ba númeru vasina ne’ebé seidauk sufisiente atu kobre populasaun hotu. Maibé, tanba agora iha ona númeru vasina ne’ebé boot, ema hotu ne’ebé rekuperadu hosi moras COVID-19, bainhira hakarak simu ona vasina, bele hakbesik ba postu vasina ne’ebé besik, atu simu vasina.

Informa mós ba populasaun tomak katak ema ne’ebé simu ona vasina doze daruak hasoru virus SARS-CoV-2 – naran vasina ida hosi hirak ne’ebé rekoñesidu hosi Organizasaun Mundiál Saúde (OMS) – bele ona sirkula livremente tama ka sai serka sanitária, no la presiza hetan autorizasaun exepsionál hosi Diretór SIJK.

Aproveita informa mós ba públiku katak, fatin atu halo teste PCR maka hanesan tuir mai:

  • Bainhira sente moras isin-manas, mear, kakorok moras ka sintoma seluk tan: bele ba konsulta iha Sentru Saúde ne’ebé besik, atu bele halo swab.
  • Bainhira atu husu autorizasaun exepsionál sai hosi serka sanitaria iha Dili: bele ba halo swab iha Centro Convenções Dili (CCD).
  • Bainhira sente katak sai kontaktu-besik ba ema ruma ne’ebé detetadu pozitivu ona, no seidauk hetan kontaktu hosi ekipa konjunta saúde: bele liga ba númeru 119 atu organiza oinsá foti swab.

Apelu

SIJK apela ba populasaun iha Dili laran no mós iha munisípiu sira seluk, atu aprezenta-an iha fasilidade saúde públiku (Sentru Saúde ka Ospitál) ne’ebé besik, bainhira sente isin-manas, ka kakorok moras, ka inus-ben, ka mear, hodi bele hetan atendimentu hosi profisionál saúde sira.

Bainhira sedu liu hatene se virus ne’e kona  ka la’e, di’ak liu, hodi nune’e bele hetan atendimentu sedu liu, no prevene tama ba iha situasaun ne’ebé hanaran síndroma insufisiénsia respiratória aguda (SIRA), ka susar/difisil atu dada-iis.

Ba populasaun iha Timor-Leste laran tomak, SIJK husu favor respeita nafatin regra prevensaun no ijiene individual, ne’ebé Governu hatuur ona, atu prevene moras COVID-19 da’et ba mai.

“Regra sira ne’e, hanesan ita hotu hatene ona, maka: uza máskara; fase-liman beibeik ho sabaun ka dezinfetante ruma; evita kose liman ba matan, inus ho ibun; bainhira kumprimenta malu, la presiza ka’er-liman, bensa-liman, rei-malu ka hako’ak-malu; evita halibur malu barak; hamriik ka tur do’ok hosi ema seluk, mínimu metru ida ho balun,” Rui Maria de Araújo afirma tan liuhosi komunikadu imprensa ne’e.

Jornalista       : Evaristo Soares Martins

Editór             : Francisco Simões  

HAKEREK NO HATÁN

Please enter your comment!
Please enter your name here