Koordenadór Jerál Unidade Implementasaun Akademia, João António Soares. Imajen Tatoli/Nelia Fernandes

DILI, 12 juñu 2021 (TATOLI)—Governu liuhosi Sekretáriu Estadu Arte no Kultura (SEAK), tuir planu, iha tinan ne’e atu harii Akademia Arte no Múzika ka Akademia Arte Indústria Kriativa Kulturál iha Timor-Leste maibé agora daudaun sei sei iha hela faze preparasaun ba legislasaun.

Notísia Relevante: Governu Sei Harii Akademia Arte Indústria Kriativa Kulturál

Koordenadór Jerál Unidade Implementasaun Akademia (UIA), João António Soares, hateten iha planu ne’ebé tuir Sekretáriu Estadu Arte no Kultura iha katak atu harii akademia iha tinan ida-ne’e, primeiru oras ne’e daudaun iha hela faze preparasaun kona-ba lejislasaun, faze oinsá atu prepara estatutu akademia ni’an hodi bele estabelese akademia ida-ne’e.

“Tinan ida-ne’e, Governu iha planu atu estabelese Akademia Arte Indústria Kriativa Kulturál (Akademia Arte no Múzika) iha Timor-Leste. Eskola ne’e, Estadu nian. Ninia prosessu primeiru mak lejislasaun, segundu mak oinsá prepara rekursu umanu sira no terseiru kona-ba futuru lejislasaun ka fatin katak eskola ne’e atu koloka iha fatin ne’ebé,” João António Soares hateten ba Agência Tatoli iha nia kna’ar fatin, Avenida Portuugal, Díli, sesta ne’e.

Koordenadór ne’e hateten, daudaun ne’e Governu prepara ona rekursu umanu hamutuk ema na’in-17 ne’ebé Governu prepara liuhosi fó bolsu estudu ba sira, nune’e iha loron aban ne’e sira hirak ne’e mak sei hamatan ba akademia refere.

“Ema na’in-15 mai hosi bolseiru. Estadu rasik prepara sira antes iha 2016, haruka sira ba eskola iha Cuba no iha mós na’in-rua (2) ne’ebé la’ós bolseiru. Maibé, sira-ne’e estuda mós iha área artístiku nian. Rekursu umanu foin iha ema na’in-17, ne’ebé prepara hela oinsá atu harii akademia ida-ne’e,” nia informa.

Oras ne’e dadaun preparasaun hosi Unidade Implementasaun Akademia nian, haruka sira halo hela atividade lubuk ida ne’ebé hanesan balun haruka tuir formasaun iha programa bolseiru hosi PróKultura Portugal (Uniaun Europeia) ni’an.

Agora daudaun, timor-oan ida hahú no kontinua filafali nia kursu iha Portugal no sira seluk hala’o hela atividade sira oinsa atu ba rekolla dadus artístiku sira-nian ne’ebé sai hanesan referénsia ka matéria, nune’e aban bainrua bele utiliza ba hanorin iha akademia ne’e.

“Programa ne’e iha área tolu ne’ebé importante mak hanesan arteplistika (halai liu ba pinta), múzika no dansa. Ida ne’e mak atu loke Akademia Arte no Kultura ne’ebé kompostu hosi departamentu tolu ne’e,” nia afirma.

Oinsá atu asegura rekursu umanu hirak ne’e, nia hatán, iha preparasaun ne’ebé oras ne’e iha unidade implementsaun akademia hamutuk ho Diresaun Jerál Arte no Kultura prepara hela, tanba Timor-Leste daudaun ne’e atravesa hela pandemia COVID-19 no serka sanitária ne’e mak agora labele book aan.

“Ami halo hela atividade sira-ne’ebé bainbain de’it ka normál. Atu asegura rekursu umanu ne’ebé iha ona ne’e mak prepara hela fatin oinsá sira atu ba tuir formasaun. Hanesan, oras ne’e dadaun sirania kolega ida ba tuir formasaun iha ona portugal, liu-liu iha área espesialidade ba múzika nian no sira seluk tuir hela formasaun relevante oinsá atu eleva filafali sirania koñesimentu atu haklean liután, liu-liu prepara sira atu sai dosente ne’ebé di’ak iha akademia ba futuru nian,” nia dehan.

Tuir planu, hosi parte Governu atu konvida mós peritu ka espesialista sira-ne’ebé maihosi estranjeiru hanesan Portugal no Indonésia liu-liu iha Institut Seni Indonesia (ISI) iha Jogjakarta, nune’e atu ajuda fó formasaun ba área sira konaba artístiku nian, prepara sira oinsá atu hanorin ema iha futuru.

Kona-ba fatin atu halo konstrusaun, nia dehan, agora daudaun iha hela prosesu halo aproximasaun ho Sekretáriu Estadu Terras no Propriedade (SETP), no SEAK mós observa ona fatin foun balun iha Metinaro.

“Ami agora dadaun iha hela prosesu, oinsá halo aproximasaun ho Terras Propriedade atu haree took fatin ne’e, bele dispónivel ba akademia arte no múzika ne’e ka lae. Maibé, daudaun ne’e fatin seidauk iha,” nia dehan.

Akademia Arte no Indústria Kriativa Kulturál Timor-Leste nian

Iha Programa VI Governu Konstitusionál 2017-2017 ne’e haktuir; Governu sei kontinua apoia atu estabelese Akademia Arte no Indústria Kriativa Kulturál Timor-Leste nian. Hahú hosi fó formasaun ba profesór sira kona-ba ida-ne’e, Akademia ne’e mak sei promove arte tradisionál Timor nian hanesan múzika, dansa, artezanatu no promove arte kriativa hanesan fotografia, audiovizuál no design.

Kona-ba múzika, sei harii Eskola Múzika nian ida, atu promove kriasaun artístika iha setór múzika nian. Eskola múzika nian sei funsiona hanesan sentru nasionál ba aprendizajen no kriatividade, hodi permite ba asesu edukasaun muzikál, prezerva no halo gravasaun ba múzika tradisionál, repertóriu (kolesaun obra múzika nian), knananuk, dansa no instrumentu sira, no investigasaun muzikál.

Akademia ne’e mós sei inklui Eskola ba ‘Belaz-Artes’ nian ida, ne’ebé sei sai hanesan sentru ida atu halo investigasaun kona ba arte vizuál sira iha Timor-Leste, no fatin formasaun nian ida iha ne’ebé artista sira sei dezenvolve sira-nia kualifikasaun téknika no artístika. Akademia Arte no Indústria Kriativa Kulturál ne’e, sei fó edukasaun no formasaun kona-ba soru tais, serámika, homan, halo obra ho ai, halo obra ho metál, obra halo hosi animál nia kulit, no kualifikasaun artezanatu nian sira seluk, no mós marketing.

Governu sei hahú halo planu atu harii Teatru Nasionál nian ida no mós Empreza Dansa nian ida, ne’ebé sei estabelese iha prazu médiu, hodi bele forma atór no dansadór sira no kria oportunidade entretenimentu nian.

Jornalista: Nelia Fernandes

Editór: Cancio Ximenes   

HAKEREK NO HATÁN

Please enter your comment!
Please enter your name here